La naguración de la Primer Sidre L’Añu tará dedicada a la figura d’esti emblemáticu presonaxe del mundiu de la sidre fallecíu va poco.
LA SIDRA.- Echar sidre y echalo bien, ye pa los asturianos una de les práutiques indispensables de la nuesa cultura sidrera, y Constantino Ovín de la Vega, conocíu como Tino el de La Barraca, foi la presona que meyor detalló esti arte col so Decálogu del Echaor onde recueye con precisión les carauterístiques que tien que tener un bon echáu de sidre.
Constantino Ovín, que nun foi nin chigreru nin llagareru, sinon emplegáu de banca, supo percibir la trescendencia del echáu de sidre y propunxo una riestra de carauterístiques a cumplir pa un correchu echáu de sidre, qu’anguañu son norma nos concursos oficiales d’esti arte. Nel mesmu sen, implicóse demientres años nel Festival de la Sidre de Nava como’l so echaor oficial y como parte del xuráu del Concursu d’Echaores en sucesives ediciones del festival.
Por eso, y por munchos más méritos nel mundiu de la sidre que nun ye’l llugar de reseñar, esta VIII Primer Sidre L’Añú homenaxearálu públicamente nel so actu de naguración, que se cellebrará el xueves 13 a les 12:30 nel Muséu del Pueblu d’Asturies y al qu’asistirán miembros de la so familia y que tará apadrináu poles confraderíes gastronómiques asturianes.
