Pesi a la rocea anicial pol cambiu d’asitiamientu ya’l mal tiempu la PSLA entamó con un lleno,,, y mucha folixa
PROGRAMA PAL VIENRES 29 DE MARZU
Na naguración el Presidente de la Fundación Asturies XXI, Marcos Abel Fernández, quixo falar mui per alto de lo que llamó les miseries y errores que llevaron a la Primer Sidre l’Añu del Muséu del Pueblu d’Asturies a Cimavilla y destacó per contra l’apoyu y solidaridá de xente y organizaciones pa poder sacar alantre esta catorceava PSLA. “Esta ye la Primer Sidre l’Añu más playa y ye la Primer Sidre de la solidaridá y se la voluntá que mos trae a tar güei equí”
El pregoneru del eventu, Carlos Rubiera, incidió tamién nel cambeu d’allugamientu, arrancando aplausos pente los asistentes, cola so visión esperanzadora “Al salir al abertal de Cimavilla, au ta l’orixe y la esencia de Xixón, tenemos que ver un simbolismu, un mensaxe, y talantar esi mensaxe como una oportunidá, mirando al horizonte del futuru nun espaciu urbanu que puede dir espurriendo col tiempo a tola ciudá”. Tamién tuvo pallabres señaldoses de la so relación cola sidre y recalcó la importancia de que se llanten pumares si queremos tener bona sidre (comu diz el canciu, “Gústame muncho la sidre, por eso planto pumares”). Darréu la so intervención Alejandra Venegas echó’l culín nagural, procediéndose a facer entrega de los premios Meyor Primer Sidre l’Añu al Llagar La Morena, cuya sidra Prado y Pedregal ye la sidre oficial d’esta PSLA, y a Cabueñes, Meyor Primer Sidre l’Añu de Xixón y tercera de la xeneral.
Depués los Siceratores, llagareros presentes y otres personalidaes comu’l presidente de la Fundación Caja Rural o el presidente del Xuráu de la Meyor Primer Sidre l’Añu acompañáronla nun culín conxuntu que dio pasu a una eshibición d’echar sidre por parte del equipu de profesionales de la Montera Picona de Ramón, pente los que destacó la presencia de Wilkin Aquiles, Campión d’Asturies d’Echaores 2023.
La mañana pasó animada, con especial participación del públicu más sidreru, cola presencia d’abondos llagareros y aficionaos naguando por prebar les sidres y valorar la nueva collecha. La hora la xinta atraxo a munchos comensales fasta la parrilla d’El Pintxu, ocupando les meses dimpuestes pa la ocasión, y la tarde entró con ánimu y los primeros bailles, entantu la reciella yera protagonista de munches de les actividades cellebraes, xuegos tradicionales, la mayada y un prestosísimu taller d’echar sidre nel que tamién los adultos participaron y que tuvo a cargu de Salvador Ondó. L’ex campión d’echadores non solo fizo esibición y taller sinón qu’anantes dio una completísima charra sobre la sidre y la cultura asturiana y depués interpretó una asturianada acompañáu de Noa, una gaitera espontanea de 9 años que dexó a toos ablucaos col so dominiu de la gaita.
A lo llargo la xornada cellebráronse tamién dos tasties guiaes, una de Sidra Prado y Pedregal. Meyor Primer Sidre L’Añu y Sidra Oficial de la PSLA, a cargu de Juan Luis García, profesor de la Escuela d’Hostelería y Turismu de Xixón y otra de la man de Donato X. Villoria, que presentó una interesante escoyeta de sidre de la Macaronesia (IGP sidra da Madeira, y sidre de Tenerife y Gran Canaria)
A lo llargo la tardi siguió aportando xente ensin parar, enllenando cuasi la gran carpa istalada pa la ocasión, calteniéndose’l bon ambiente hasta la hora del preslle.
Pa los que nun pudieron esfrutar d’esta apoteósica apertura de la Primer Sidre l’Añu, que nun s’esmolezan, tovía tienen tiempu fasta’l domingu.
