Cuatro vegaes Campión de Asturies, únicu ganador de los dos mundiales d’echaores, llevó’l so arte a la tele participando en ‘Got Talent’ y tien nidio que tolo fai por que la sidre y la cultura asturiana, gústen-y.
LA SIDRA.- Cuando llegasti de la República Dominicana ¿Podríes maxinar que dibes ser cuatro vegaes campión d’Asturies y dos vegaes campión del mundiu d’echar sidra?
Non, que va. Yo vini con 26 años a convalidar les mios materies p’ampliar los mios estudios y depués alquirir la nacionalidá y trabayar na mio carrera, que yera’l márqueting, pero a la fin nun lo fixi, empecipié a trabayar nuna sidrería, escomenzó a prestame y equí toi.
Nin siquier cuando entamé nos concursos entré con esa mentalidá. Quedar ente los diez primeros, si, eso yá se me metió dempués de que fui a los trés primeros concursos. Cuando yo entré, siempres los meyores diez dexábense pa la final y nel mio primer concursu yo fui l’once, nel segundu yá cayí nel ochavu… en realidá too escomenzó como una chancia, lleváronme Pablo Costales y Pedro, con otru compañeru, pa ver quien quedaba delantre, elli o yo yo salí nel once y elli nel doce. Lleváronme como una chancia, “vamos llevar a un morenu a los concursos, que lo echa bien”; estranxeros yo creo que yera’l primeru nesi momentu. Pedro foi’l que m’enseñó pero Pablo yera’l que me llevaba y trayía.
