Inicio > Gastronomía > Trabanco nos restoranes de Nacho Manzano nel Reinu Xuníu
GastronomíaLlagares

Trabanco nos restoranes de Nacho Manzano nel Reinu Xuníu

Son la so Sidre Natural d’Escoyeta con Denominación d’Orixe Sidre d’Asturies, Poma Áurea, y Ávalon

LA SIDRA.- La Sidre Natural d’Escoyeta, Poma Áurea y Ávalon yá puen esfrutase nos Iberica Restaurants de Nacho Manzano nel Reinu Xuníu. Esta seleición de productos de Trabanco amiéstase a la cellebración del décimu aniversariu del grupu de restauración británicu. Una alianza que se pon en marcha nel Pop Up de Casa Marcial, fasta’l 3 de marzu, yá que Nacho Manzano lleva a Londres un menú degustación de 12 platos con harmonizaxes esclusivos con sidre asturiano nos restoranes Iberica Canary Wharf y Victoria.

Y que dempués de les cellebraciones del aniversariu va caltener cola presencia d’ Ávalon na capital británica.

La see d’Iberica en Victoria va tresformase n’un chigre tradicional asturianu onde l’oru llíquidu d’Asturies va ser el braeru protagonista. L’establecimientu va tar afatáu pa la ocasión con banderes asturianes, toneles, botelles y ferramientes tradicionales, ente les que va haber echaores  y chigres.

Les sidres de Trabanco que podrán tastiase nesta ocasión son:

Sidre Natural d’Escoyeta con Denominación d’Orixe Sidre d’Asturies. Trabanco ye sinónimu de tradición, saber faer y calidá nel mundiu de la sidre. La sidre natural d’Escoyeta ye la resultancia de la selección de les meyores variedaes de mazana 100% asturiana. Del mostiu de mazana natural que llelda con lleldos naturales llógrase la meyor sidre reposao en toneles tradicionales de maera de castañal.

Poma Áurea, ye la primera brut nature de Trabanco. Una bebida fresca, con una borbolla fina y una bona acidez. Ellaborada con dos races tradicionales de mazanes asturianes: Regona y Raxao. Poles sos cualidaes harmoniza a la perfeición con arroces, guisos y platos marineros pero tamién pue ser la meyor compaña del pavu, capón o corderu. Al nun tener zucre amestao dexa dixestiones llixeres y placenteres, y ye una estupenda compaña dende l’aperitivu o entamu de la comida fasta’l postre.

Avalon una sidre en botellín desendolcada pol Grupu Trabanco que se consume de forma asemeyao a la cerveza. Ye una sidre natural, ellaborao de magar mazanes especialmente escoyíes pa esta sidre enfrescante. Mazanes amargoses, acedes y dulces collechaes y escoyíes por Trabanco. Una sidre nuevo, afrutao y de baxa graduación alcólica, afayaíza pa consumir en momentos d’ociu. L’enclín xeneralizáu de consumu de la sidre a nivel internacional ta virando a esti formatu de consumu. Avalon ye una de les sidres más internacionales de Trabanco.

La sidre va tar bien presente demientres el mes de marzu nos  ocho establecimientos montaos sol sellu Iberica que cunten col bon faer del xef asturianu nel Reinu Xuníu. Cinco de los restoranes tán en Londres y el restu repártense en Manchester, Leeds y Glasgow. La cellebración del Mes d’Asturies va ser la ocasión ideal pa esfrutar de la meyor gastronomía asturiana regao cola meyor sidre.

 

(Visited 570.590 times)

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies