Inicio > Cultura sidrera > Una década de vida: presentación de la X PSLA y del concursu pa escoyer la sidre oficial
Cultura sidreraLlagaresPSLASidreturismu

Una década de vida: presentación de la X PSLA y del concursu pa escoyer la sidre oficial

El sábadu 13 d’abril cellebraráse’l concursu La Meyor Primer Sidre l’Añu pa escoyer a la sidre oficial de la PSLA en La Montera de Ramón (cai Saavedra, 3), el veredictu daráse a conocer a les 18:30 hores

Una década de vida cumple la Primer Sidre l’Añu. Xixón prepárase nuevamente pa una de les sos cellebraciones con más raigañu y tradición dientru del so calendariu festivu. La PSLA va llevar a cabu del 18 al 21 d’abril nel Muséu del Pueblu d’Asturies. L’horariu va ser el xueves de 13:00 a 22:00 hores; el vienres y el sábadu de 12:00 a 22:00 hores y el domingu de 12:00 a 18:00 hores. La PSLA ye una de les manifestaciones más clares del sofitu de la revista La Sidra y de la Fundación Asturies XXI pa que la Cultura Sidrera Asturiana seya reconocía como Padremuñu Cultural Inmaterial per parte la UNESCO, iniciativa de la que dichu mediu de comunicación ya istitución son embaxadores.

El xueves 11 d’abril tuvo llugar a les 12:00 hores en La Casa de la Palmera en Xixón la presentación d’esta décima edición. Nel actu intervinieron Jorge González-Palacios, xerente de Divertia; Marcos Fernández, presidente de la Fundación Asturies XXI; Pedro Baldó, llagareru d’El Duque; y Óscar Estors, miembru de ’30 díis en bici’. Marcos Fernández, señaló que la Primer Sidre l’Añu foi declarada pol conceyu de Xixón como Fiesta de Raigañu Social. “Lo que foi un proyectu nel so momentu, agora ye un alcuentru consolidáu. La PSLA ye una referencia na ufierta sociocultural xixonesa, nel mundiu la sidre y tamién a nivel internacional, yá que alleguen a ella presones d’estremaos países d’Europa pa vivir esta cellebración” dixo.

Fernández tamién quinxo destacar que la PSLA ye la espicha más importante qu’esiste n’Asturies en nivel de representación: “Un de los nuesos oxetivos foi revitalizar les espiches de Selmana Santa. Enantes esta yera la fecha cuando se corchaba y cuando se realizaben les espiches. Quinxímos siguir con ello y da-y un impulsu. Tamién, con esti eventu, búscase reivindicar la sidre sobro la madre, la sidre que ta ensin trasegar, la primera que salía del tonel. La modernización de los llagares llevó a que cuasi sumiera, pero desque escomencemos fasta agora, consiguimos revitalizala y trés o cuatro llagares industriales yá lo comercialicen”

La PSLA va cellebrase del 18 a 21 d’abril y, por 6 euros que cuesta la entrada, los asistentes van poder esfrutar de la sidre nuevo d’alredior de 70 llagares. “Pero non solo de la sidre, tamién  de toles actividaes; y nesti puntu queremos destacar l’ambiente festivo y la gran cantidá d’iniciatives que preparemos. Esto permite un consumu sele y, sobremanera, responsable” apuntó’l presidente de la Fundación.

El primer actu va tener llugar el 13 d’abril, cuatro díis enantes qu’empecipie puramente la PSLA. Esti sábadu va ser cuando se lleve a cabu’l concursu ‘La Meyor Primer Sidre l’Añu’ nel que van participar unos 40 llagares industriales y nel que se va a escoyer per mediu d’una tastia a ciegues la sidre oficial del eventu. El certame va llevase a cabu en La Montera de Ramón de Xixón (cai Saavedra, 3). Rializaráse en dos fases: la primera pela mañana y na que se van escoyer les cinco sidres finalistes. La segunda va ser pela tardi y nella dará’l veredictu final colos cinco primeros puestos a les 18:30 hores.

“La PSLA ye un alcuentru participativu nel que los asistentes van ser los protagonistes. Queremos dar puxu a los ellementos socioculturales de la espicha, por ello cuntamos con una programación peramplia” dixo Marcos Fernández y citó dellos exemplos como la mayada de sidre pa neños, un concursu d’echarores diariu paneños, xuegos y deportes tradicionales, y fasta un showcooking por que los más piqueños de la casa puedan rializar les sos propies ellaboraciones gastronómiques.

Coles mesmes, el presidente de la Fundación Asturies XXI indicó que la PSLA collabora cola hostelería xixonesa, y nesti puntu estimó la presencia nel actu de Ricardo Álvarez, presidente d’Otea Xixón. “Vamos apurrir a los asistentes un mapa con toles sidreríes de Xixón. La PSLA remata a les 22:00 hores y muncha xente allega darréu a los chigres” desplicó Fernández.

Per otru llau, los entamaores tamién quinxeron amosar el so compromisu col mediu ambiente y los nuevos enclinos, d’ende que convidaren a collaborar a l’asociación son ‘30 díis en bici’. El domingu 21, la entrada va ser gratuito pa quien alleguen cola so bicicleta al Muséu del Pueblu d’Asturies. Tamién ta permitía la entrada de mascotes y na ufierta gastronómica inclúise un menú veganu.

La Fundación Asturies XXI foi nomada embaxadora de la Cultura Sidrera Asturiana pa que seyaa reconocida como Padremuñu Cultural Inmaterial per parte de la UNESCO. Por esti motivu na PSLA van recoyese firmes pa pa validar la candidatura “y pa consiguir que’l Principáu la presente d’una vegada”. “Esta campaña va sirvir pa primir” manifestó Fernández y amestó: “ello ye que’l pregón va correr a cargu del historiador Luis Benito García, que ye quien propunxo la idea de solicitar esta declaración, y quien conformó l’equipu científicu pa realizar los trabayos d’investigación pal so sustentu. Tamién va intervenir na naguración de la PSLA el conceyal de Turismu, Deportes, Festexos y Mocedá de Xixón, Jesús Martínez Salvador; y vamos faer entrega del diploma de la Meyor Primer Sidre  l’Añu. La naguración va tener llugar a les 13:00 hores del xueves 18 d’abril”, dixo Fernández.

Darréu, el presidente de la Fundación Asturies XXI numberó más actividaes de la PSLA como l’amuesa d’Asturianada y Sidre’, el Concursu Sidre Fecho en Maera que se va llevar a cabu’l domingu 21, actuaciones de bandes de gaites, artesanía del país, un cursu d’enxertos de pumares o cates de sidres nacionales ya internacionales. Más puntos a destacar ye que nuevamente la PSLA va ser un espaciu cardioprotexíu; que se va cuntar con  información multilingüe gracies traductores d’italianu, inglés, francés, portugués y francés; y que se va tornar a incidir na campaña ‘Bebi con xacíu’ p’afaese a la normativa europea que señala qu’en tolos eventos rellacionaos col acol, fáigase llamamientu al consumu responsable.

Pela so parte, Jorge González-Palacios, xerente de Divertia, desplicó que toles previsiones hoteleres apunten que se va a rondar la plena ocupación en Selmana Santa. “Y ye gracies a actividaes como la PSLA que fai de Xixón un referente nel norte d’España. Ye una actividá venceyada a la sidre, añu especial importante pa dar puxu a la so reconocencia pola UNESCO. La sidre supon una exa estratéxica dientro del Plan d’Acción de Turismu, polo tanto tamos siempres sofitándola como un valor amestáu respeutu a otros destinos turísticos d’España” aseguró.

El llagareru Pedro Baldó quixo estimar“la moral” de los entamaores pola gran cantidá de trabayu que trai la PSLA: “Hai que reconocer que ye una espicha bien guapa, bien festiva, a la xente que nun ye de Asturies lláma-y enforma l’atención cómo facemos les cellebraciones equí y cómo mos divertimos. Tenemos que promocionar la nuesa manera de vivir y de ser. Somos presones abiertes y la sidre fomenta la comunicación colos demás, ye la so sencia” manifestó. Finalmente Óscar Estors esplicó qu’una de les intenciones de la so asociación ye dar puxu al negociu local y d’ende qu’entamen la ruta de la sidre, yá que ye “daqué bien nueso” qu’hai que fomentar, d’ende que decidieren collaborar cola PSLA per segundu añu consecutivu.

Cola Primera Sidre l’Añu, entamada pola revista LA SIDRA y la Fundación Asturies XXI, empecípiase la temporada sidrera asturiana, siendo yá un alcuentru de referencia onde cultura, ociu, tradición y gastronomía van de la mano.

(Visited 656.858 times)

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies