Per quintu añu consecutivu, nesta VII Primer Sidre l’Añu, LA SIDRA entama’l Concursu de Sidre Casero.
LA SIDRA.- El concursu ta empobináu a llagareros non profesionales qu’empleguen el sistema d’ellaboración tradicional en pipa de maera, al oxetu de da-y puxu al usu d’esti material pa la ellaboración de sidre. Cellebraráse’l domingu 27 de marzu y espérase cuntar con una interesante participación.
L’afoguín col que nos tiempos caberos vien sustituyéndose la maera pol acieru inosidable o la fibra nos llagares industriales, ta acarretando que seyan munchos los llagareros non profesionales que tamién se decantaren por esta triba de materiales, desdexando la maera, ciértamente muncho más trabayosa, pero con munchu más carauter y propiedaes organoléptiques específiques a les que nun hai por qué renunciar.
Ca participante tendrá de presentar 6 botelles a LA SIDRA, vien nel so llocal de Prendes Pando 11 baxu o na cellebración de la Primer Sidre l’Añu, nel Muséu del Pueblu d’Asturies, del 24 al 27 de marzu. Almitiráse la participación fasta’l domingu 27 marzu a les 13 hores.
Esti concursu de sidre casero ye l’únicu de los esistentes que tien ámbetu asturianu, darréu que los fasta agora esistentes suelen tar llimitaos al conceyu nel que se convoca. Arriendes d’ello, nesti casu l’ámbitu asturianu entiéndese comu’l territoriu hestóricu asturianu, ello ye, l’Asturies d’anguañu, la de Santillana, la de Tresmiera, La Llébana, norte de Llión y oriente de Lugo.
