Ente les novedaes d’esta XL edición del Festival de la Sidre de Nava, allexa un orixinal tren sidreru que percorrerá cinco llagares navetos.
LA SIDRA.- El XL Festival de la Sidre de Nava cellebráse del 4 al 11 de xunetu, y el so programa inclúi interesantes novedaes coles que se remocica y actualiza enforma. Ente elles allexa el tren gratuitu que saldrá’l domingu 11 del Muséu de la Sidre pa percorrer cinco llagares navetos onde podrá tastiase la so sidre. Arriendes d’ello, y per primer vegada, tamién habrá una amuesa de cocina, a cargu de Ramón Celorio, direutor gastronómicu del Grupu Nature.
Caltiénense dientru la programación avezada el pregón, a cargu del direutor xeneral de la Vuelta a España, Jorge Guillén, l’hermanamientu de les sidres d’Asturies que fai la Bona Confradería de los Siceratores (sábadu ocho a les dos de la tardi), y el Concursu d’Echaores que fadrá la so trixésima edición.
Na presentación del programa d’esti festival cuntóse col estrenu d’un vidiu de tres minutos dirixíu pel navetu Luis Canteli pa da-y puxu al Festival nes redes sociales, nel que reivindica Nava como villa de la sidre con una orixinal hestoria, “El secreto de la pócima” que llamentablemente emplega un chapurriáu vergoñante, con frases tipu “un secretu que ha ido pasando” “a cuanta xente hemos ayudao”, y del que sedríe deseable cuntar con una versión n’asturianu normal, y versiones n’inglés y n’español.
