“Lo meyor, la camaradería y l’ambiente que se xeneren alrodiu la sidre”
LA SIDRA.- Del llagar El Sareganu, agora Fonciello, que sigue llevando la mesma familia, hai muncho que cuntar, y del llabor de les muyeres nel llagar tovía más, eso ye lo que fai Pili Canteli precisamente nel díi que cumple los 70 años.
¿Qué ye lo primero que te vien a la cabeza al remembrar el trabayu nel llagar?
Enantes nun había la maquinaria d’anguañu. Por exemplu, güei les máquines encárguense de llavalo too y va más rápidu. Enantes, pa corchar un tren de sidre, teníamos que pasar primeru una selmana llavando les botelles a manu. En promediu, llavábemos unes 200 caxes al día.
¿Cómo yera’l procesu de llaváu de les botelles?
Usábemos dos barreñes grandes enllenes d’agua. Caúna d’elles yera como mediu tonel. Dábemos un primer llaváu nuna barreña y llueu el segundu na otra, col agua llimpio. Entós poníemos les botelles a recudir nunos tableros que llamábense “burros”.
