Inicio > Chigres > Sidra Somorroza gana’l pleitu la botella
ChigresCultura sidreraLlagaresLlagaresNoticies

Sidra Somorroza gana’l pleitu la botella

El Xulgáu de lo Mercantil nº 1 de Santander nun da por válidu’l rexistru de la botella de sidre rializáu pola Asociación de Sidre Asturiana (ASSA)

La denuncia presentada énte’l Xulgáu de lo Mercantil de Santander pola Asociación de Sidra Asturiana (ASSA) escontra Jesús Gómez Solórzano, productor de Sidra Somarroza -Renedo de Piélagos- por utilizar el modelu de botella tradicional asturianu -molde fierru- que rexistraren como de la so porpiedá nel añu 2000, foi desestimada nuna sentencia na qu’insta a la OEPM pa que se «proceda, inmediatamente, a la cancelación de la inscripción del registro», lo que lliberaliza’l plenu usu de la botella en llitixu, amás d’imponer les costes xudiciales al colleutivu asturianu. Sicasí, la sentencia espublizada nun ye firme y cabe resursu énte l’Audiencia Provincial de Cantabria.

Una denuncia controvertía

La denuncia presentada por ASSA, asociación a la que pertenecen parte de los llagareros asturianos -non toos, nin la mayoría- resultó controvertía dende un entamu, non solo polo flebe d’una argumentación xurídica que pretende faer suyu’l rexistru d’un bien patrimonial asturianu con sieglos d’esistencia y cuyu rexistu orixinal caducó va más d’un sieglu, sinon porque’l propiu llagar de Renedo de Píelagos solicitó la so incluxón na Asociación de Sidra Asturiana pa solucionar el problema: propuesta pa ná estraña, darréu qu’ellabora sidre asturiana -ello ye, siguiendo’l métodu tradiciona asturianu d’ellaboración de la sidre- y ta asitiáu nun territoriu que foi asturianu fasta’l primer terciu del sieglu XIX (Asturies de Santillana).

Per otra parte, los llagareros nun inscritos nesta asociación tamién criticaren enforma terriamente los intentos de patrimonializar dichu rexistru por ASSA, darréu qu’atalanten que de ser asina tamién podríen actuar escontra los llagareros asturianos que nun pertenecen a dicha asociación, colo que lloñe de defender el padremuñu asturianu -como afirma la mencionada asociación- lo que tan defendiendo ye’l so propiu padremuñu, en detrimentu d’aquellos llagares que nun tean asociaos y que podríen vese obligaos a dexar de corchar na clásica botella de sidre asturiana, o a pagar drechos a  ASSA pa poder facelo.

Posibilidaes de recursu

En rellación a esta polémica sentencia, ASSA emitió un comunicáu nel que recuerda que la sentencia nun ye firme y cabe recursu énte l’Audiencia Provincial de Cantabria y que la decisión tomaráse n’Asamblea Xeneral de socios convocada pal prósimu 19 setiembre, onde decididrán si presenten un Recursu d’Apelación.

Asina mesmo, tamién reiteren la so consideranza de que “la botella de sidra natural asturiana es una activo del sector sidrero asturiano, que forma parte de nuestro patrimonio, nos vemos obligados a defenderla”, dando a atalantar de dalguna miente qu’anque consiguieren ver reconocíu’l rexistru de dicha botella a nome de la so asociación, nun sedríe utilizáu escontra’l restu del seutor sidreru asturianu que nun pertenez a la mesma.

(Visited 454.971 times)

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies