La presentación del llibru cuntó cola presencia de munches de les sos protagonistes
LA SIDRA.- L’actu, nel qu’intervino Carme Pérez, como editora, Susana Sela –una de les escritores- Flavio Lorenzo –fotógrafu-, Roberto Gzález-Quevedo y David Rivas, cuntó con una importante asistencia de públicu, ente les que s’atopaben bon númberu de les protagonistes, que nun quinxeron perder esta oportunidá de reivindicar el so papel nel mundiu la sidre.
Nes intervenciones destacóse precisamente l’importante llabor de la muyer nel llagar, y como esti papel pasa normalmente desapercibíu socialmente, pesia que como se destacó nes intervenciones, les muyeres siempres se reivindicaron, como lo preba la continuidá de les muyeres al frente de los llagares tres el fallecimientu del home, y como afayaron el nome del llagar a la nueva rialida, como ye’l casu de Viuda de Zarracina, Viuda de Palacio, Viuda de Angelón o Viuda de Corsino.
El llibru en custión, editáu en cuatricomía, con tapa dura, y d’una calidá impresionante, tantu polos conteníos –les entrevistes y les semeyes- como pol papel emplegáu y la perbona impresión d’Imprenta Gofer.
Pa la so espublización la editorial Espublizastur cuntó col sofitu de la Viceconseyería de Cultura, Política Llingüística y Deporte del Principáu d’Asturies pal espardimientu, estudiu y fomentu del valor del patrimoniu cultural asturianu; y pa la promoción del llibru n’asturianu; lo mesmo que de la FMCEYUP del Ayuntamientu Xixón, pa la promoción d’empreses editoriales.
El llibru tien un preciu de 35 € y agora mesmo pue mercase na oficina d’Espublizastur, na Cai Decanu Prendes Pando 11 de Xixón, (T. 652 594 983), online en Sidra Shop y en TiendaAstur, tando previsto la so prósima distribuición peles principales llibreríes asturianes.
VER SEMEYES DE LA PRESENTACIÓN
