Inicio > Cultura sidrera > Entregaos los gallardones del Concursu Semeyes LA SIDRA
Cultura sidreraEventosLa sidra

Entregaos los gallardones del Concursu Semeyes LA SIDRA

El primer premiu foi pa José Agustín Gurruchaga d’Euskadi; siguiéronlu Arturo Rodríguez y Carmen Pascual, de Cantabria y de Almería respeutivamente; la mención especial JR foi de nueu pal asturianu Óscar Chamorro

LA SIDRA.- El Concursu  Semeyes LA SIDRA fortaleció nuevamente los llazos que xuncen a vascos, cántabros y asturianos. Y per primer vegada a una almeriense. Un fotógrafu de caúna d’estes Comunidaes Autónomes foi gallardonáu na XIII edición del certame. La sidrería La Galana en Xixón foi otra vegada l’escenariu de la entrega de premios el pasáu 7 de marzu. Una nuechi na que pudo vese a la nuesa bébora astur por escelencia representada al traviés del oxetivu de los artistes finalistes del certame.

El primer premiu foi pa la semeya ‘Mazana’ del guipuzcoanu José Agustín Gurruchaga Garagarza, dotáu con 700 euros y medalla d’oru de la Confederación Española de Fotografía –CEF–. “A min encántame’l concursu, porque dame la opción de tar pensando nelli tol añu. Ye claru: o ye sidra o ye mazana. Asina que demientres l’añu toi dándo-y vueltes ver qué faigo” manifestó Gurruchaga y amestó: “Yo quedé un poco asustáu… son munchos participantes. ¡Anda que nun hai semeyes! Y son bien bones. Esti añu hebio suerte”. Y ye qu’a esta edición presentáronse 565 semeyesde 171 fotógrafos, provenientes de 28 países distintos.

Siguiendo cola entrega premios, el primer accésit recayó nel cántabru Arturo Rodríguez Ortiz, residente n’Uviéu, y que participó con “Perfilando’l momentu”. El so premiu foi dotáu con 200 euros y medalla plata de la CEF.  El segundu accésit foi pa “Bruno y León” realizada por Carmen Pascual Soler, residente de Almería. Ella recibió 100 euros y medalla bronce de la CEF. Finalmente, el premiu especial qu’otorga’l llagar JR foi, otru añu más, pal asturianu Óscar Chamorro Flórez y la so instantánea “Bodegón asturianu”. A elli apurriéronse-y dos caxes de sidre del llagar JR.

La sidrería La Galana, al igual que n’años anteriores, convirtióse nel primer establecimientu d’esti añu que va acoyer una esposición coles obres finalistes y qu’en meses próximos va visitar más llocales asturianos.

El Concursu Semeyes LA SIDRA foi convocáu pola revista LA SIDRA y la Fundación Asturies XXI; foi entamáu pola Asociación Asemeyando; y cunta col padrociniu del llagar JR y el sofitu de la Sidrería La Galana. Trátase del certame fotográficu más antiguu de los que tienen la emblemática bébora asturiano y a la mazana como temática principal.

Semeya: Pela esquierda, Arturo Rodríguez que llogró un accésit; José Agustín Gurruchaga, ganador del primer premiu; Luis José Vigil-Escalera, presidente del xuráu; Verónica González, xuráu que recoyó’l gallardón en representación de Carmen Pascual que llogró l’otru accésit, y Óscar Chamorro, premiu especial JR. / L. Montila

 

(Visited 800.454 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies