Inicio > Cultura sidrera > La XIV Primer Sidre L’Añu continuará cellebrándose en Selmana Santa
Cultura sidreraEncamientosEventosGastronomíaLlagaresSidre CaseroSidreturismu

La XIV Primer Sidre L’Añu continuará cellebrándose en Selmana Santa

L’allugamientu nel Muséu del Pueblu d’Asturies, depende d’ún resolvimientu de l’alcaldía de Xixón, pero en cualisquier casu la Fundación Asturies XXI ta buscando llugares alternativos

L’informe negativu emitíu pola direición del Muséu del Pueblu d’Asturies en base a una llei de 2015 que fasta esti añu nun supunxera denguna torga pa la so cellebración fixo apelligrar la continuidá del eventu que marca l’entamu de la temporada sidrera asturiana, pero tres la presentación del pertinente Recursu d’Alzada, la Fundación Asturies XXI, entamaora de la Primera Sidre L’Añu amuésase confiada en que finalmente se caltenga la so cellebración nel Muséu del Pueblu d’Asturies.

 

LA SIDRA.- Magar ser la Primera Sidre L’Añu ún de los pocos eventos declaraos d’Interés Social’ pol ayuntamientu de Xixón, y a tar venceyada la so cellebración al Muséu del Pueblu d’Asturies; pese a ser la cultura asturiana de la sidre declarada Bien d’Interés Cultural pol Principáu d’Asturies en 2014 y a la espera de ser reconocida esti añu como Padremuñu Inmaterial de la Humanidá pola UNESCO; y siendo la Primer Sidre L’Añu una espresión fundamental de dicha cultura asturiana de la sidre en tolos sos aspeutos, la direición  del Muséu del Pueblu d’Asturies decidió informar negativamente tocántenes a l’autorización de la so cellebración esti añu en dichu espaciu atendiendo a una llei de 2015, que fasta la fecha nun supunxera dengún problema pa la realización d’esti eventu cultural.

En concretu, faise referencia al artículu 20.y de la Llei 4/2015 de 6 de marzu d’atención integral en materia de drogues y bébores alcóliques, según el cual nun se permite la vienta, suministru, publicidá o consumu de bébores alcóliques en centros de les alministraciones públiques”.

Dende la Fundación Asturies XXI entienden que la llexislación asturiana al respeutu exime a la sidre de recibir el mesmu tratu que’l restu de bébores alcóliques, y por ello consideren que, dende la so aprobación, enxamás nun foi aplicada a la Primer Sidre L’Añu, realizándose nel Muséu del Pueblu d’Asturies  con toa normalidá demientres les 8 ediciones posteriores a l’aprobación de dicha llei.

Ye más, demientres esi periodu, nel Muséu del Pueblu d’Asturies diferentes organizaciones, partíos políticos y empreses, vinieron realizando diversos eventos nos que se consumíen  bébores alcóliques que nun yeren sidre, y que quiciabes pudieren vese afeutaes pol referíu artículu.

Dende la Fundación Asturies XXI, entidá entamadora del eventu, sopelexen “la nuesa estrañeza por esti cambiu d’actitú, y reiteramos que siendo, como se refirió enantes, la cultura asturiana de la sidre Bien d’Interés Cultural, y siendo los actos de la Primer Sidre L’Añu una espresión, potenciación y divulgación de dicha cultura, paez evidente que nun tuviera d’haber dengún problema por qu’esti añu siguiérase cellebrando nel Muséu del Pueblu d’Asturies como venía siendo avezao, enantes y dempués de la llei a la qu’agora se recurre pa refugala”.

D’otra miente, tamién consideren importante aprofiar que nestes 13 ediciones de cellebración del eventu, enxamás nun se reseñó dengún incidente públicu, nin se riquirió intervención policial nin asistencia sanitario, y los daños materiales causaos nel MPA reduxéronse a daños en reposabrazos d’un bancu, una portiella  y un dispensador de papel d’un bañu;  siendo asumíos los costos del so arreglu pola Fundación Asturies XXI

Ye nidio que l’arbitraria negativa al usu del espaciu del Muséu del Pueblu d’Asturies supón un claru perxuiciu pa la Primer Sidre L’Añu, yá afitada dempués de 13 ediciones cellebrándose ellí, y pa la mesma Fundación Asturies XXI tocántenes a costos y organización. Ello asina, presentaron un Recursu d’Alzada énte l’Alcaldía de Xixón por que reconsidere la decisión y en función de l’amplia argumentación apurrida, permita la realización de la XIV Primer Sidre L’Añu nes feches y espacios solicitaos pola Fundación Asturies XXI.

Nesta tesitura, desque se-yo notificó oficialmente’l pasáu llunes 19 de febreru esti resolvimientu negativu, tan a la gueta d’un allugamientu alternativu pa esta XIV Primer Sidre L’Añu, “agradeciéndo el sofitu y conseyu que venimos recibiendo dende’l mesmu Ayuntamientu Xixón, y mui concretamente dende la Conceyalía de Cultura y la FMCDUP, dende diverses entidaes como Divertia, la Fundación Caxa Rural de Xixón, la Cámara de Comerciu de Xixón, asociaciones de vecinos como la de Roces, ya inclusive d’otros conceyos asturianos que s’ufiertaron como see de dichu eventu. Sicasí entendemos que la Primer Sidre L’Añu ye un eventu íntimamente y hestóricamente venceyáu a Xixón”.

En cualisquier casu, ye voluntá de la Fundación Asturies XXI la cellebración nesta Selmana Santa de la XIV Primer Sidre l’Añu nel Muséu del Pueblu d’Asturies, y de nun ser asina, nun espaciu alternativu que dea continuidá al eventu, a la espera “d’un cambiu d’actitú que permita recuperar lo más aína’l so allugamientu orixinal, natural y específicu nel Muséu del Pueblu d’Asturies”.

 

Pa recibir el PDF de la revista LA SIDRA, fai falta tar dáu/da d’alta nel whatsapp de LA SIDRA ¡Gratis!

 

(Visited 2.489.074 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies