Inicio > Sin categoría > Entamu LA SIDRA Xunetu’21 (Nb. 207)
Sin categoría

Entamu LA SIDRA Xunetu’21 (Nb. 207)

Entamu

Metanes del branu, y llamentablemente, el Covid-19 sigui condicionando y marcando les nueses vides. Les nueves variantes, la bien discutible efectividá de les midíes sanitaries tomaes al efeutu, el perlentu procesu de vacunación, y sobromanera, les polítiques de hostigamientu a la hostelería, y l’acosu mediáticu a la población, acobardándola cuando non criminalizándola direutamente como se ta faciendo agora mesmu cola mocedá, crea una situación na que la normalidá entá paez bien alloñada.

N’unos momentos nos que tuviéramos de tar camentando n’esfrutar de les fiestes de prau, y los múltiples eventos sidreros y gastronómicos, atopámosmos n’una situación d’incertidume qu’en ná beneficia al seutor de la sidre.

Pesia l’inxente esfuerzu de les sidreríes, siguiendo ce por be les dimposiciones sanitaries, reinventándose, ampliando les sos ufiertes y apostando por una paulatina y responsable normalización; y magar los avances de los llagareros, que potenciaron de forma notable la so ufierta online y la so presencia nos lliniales d’alimentación, lo cierto ye que nun hai forma de normalizar la situación, munchu más, cuandu’l seutor atópase desdexáu dafechu polos sos responsables políticos.

El “Principado” non solo nun emprestó al seutor de la sidre l’atención que merez pola so importancia social, cultural y económica, sinón que guarda un vergoñosu silenciu frente a toles demandes que se-y vienen rializando.

Agora mesmo los llagares atópenese colos toneles y tinos ocupaos por sidre atrasao del añu anterior, y ensin l’abonda capacidá p’absorber la importante produición de mazana que s’espera na collecha d’esti añu. La situación nun ye fácil, porque’l “Principado” nun facilita lliberar esi escedente pa la tresformación n’alcol o vinagre, a diferencia de lo qu’asocede n’otres comunidaes, como ye’l casu del País Vascu, qu’acaba d’aprobar una aída de 10 millones d’euros pa ello.

Seya que non, l’actividá sigue, el Festival de la Sidre de Nava, avanzó na so normalización y cellebróse con ésitu; la DOP Sidre d’Asturies va presentar aína les sidres d’esti añu –de forma restrinxía-, los concursos d’echaores paecen escomenzar a recuperase, y eventos un pocu más alloñaos como la Fiesta de la Sidre de Xixón, o’l Salón Internacional de les Sidres de Gala, preven cellebrase con una rellativa normalidá.

Y sobro too, da gloria ver les pumaraes cargaes de mazana, y eso siempres ye una bona señal.

(Visited 1.189.487 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies