Inicio > Opinión > Entamu LA SIDRA d’Abril’23 (Nb. 228)
Opinión

Entamu LA SIDRA d’Abril’23 (Nb. 228)

Entamu

Entama fuerte la temporada sidrera asturiana con una Primer Sidre L’Añu que trunfó perriba toles previsiones, y que torna a evidenciar el puxu que tien la sidre y tola cultura que se xenera al so alrodiu.

Cuatro díis de sidre y cultura sidrera nun marcu escepcional comu ye’l Muséu del Pueblu d’Asturies.

Entama fuerte, y de magar agora preséntasemos una temporada na que nun hai selmana ensin dalguna convocatoria pública na que la sidre nun seya la protagonista.

Per agora acaba fallase’l XV Concursu Semeyes LA SIDRA, col sofitu del llagar JR, qu’aporta nueves espresiones artístiques a la sidre y la so cultura, y cuya esposición anúnciase pal mes que vien; l’echáu de sidre avanza profesionalmente, la ‘Folixa na primavera’ mierense presenta un programa más sidreru que nunca, en Tapia de Casariego cellebrarán la so ‘V Fiesta de la sidra’ y la presencia d’Asturies y la so sidre a nivel internacional perafítase, cola presentación de la prósima edición del Salón Internacional de les Sidres de Gala en Le Mans y en Cidrexpo, y prósimamente en Franckfurt y en Madeira. Hai munchu mundiu y muncha sidre.

Per otru llau, la sidre y les sidreríes siguen trunfando nos concursos gastronómicos, como ye’l casu del ‘Meyor Cachopu’l Mundiu’ o la ‘Meyor Fabada’l Mundiu’, los chigres y merenderos aprovechen enforma esti tiempu tan soleyeru y les fiestes de prau yá tan ehí ¡Qué rico sabe la sidre nuna fiesta de prau!

D’otra miente, el Muséu de la Sidre de Nava yá cunta con direición y anque ye pronto pa conocer les llinies que seguirá, hai que valorar esti pasu allantre; la candidatura de la cultura asturiana de la sidre como Padremuñu Inmaterial de la Humanidá vien de presentase formalmente énte la Unesco; y, con dalgún qu’otru sobrosaltu, la DOP Sidre d’Asturies sigue dinamizando’l panorama sidreru de les sidres acoyíes a esa marca de calidá.

Lo que sigue como taba ye’l Plan Estratéxicu de la Sidre y la Mazana, que yá nun ye que nun avance, ye qu’ensiquier se recueye –polo que sabemos- nos programes elleutorales d’estes elleiciones asturianes… yá tamos entardando.

Pa recibir el PDF de la revista fai falta tar dáu/da d’alta nel whatsapp de LA SIDRA

(Visited 2.503.189 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies