Inicio > Opinión > El mayor problema de la sidre asturiano
Opinión

El mayor problema de la sidre asturiano

La emigración forciao del 50 % de la mocedá asturiano de 20 a 38 años supón la mayor menacia a la que se ve sometida la nuesa bébora identitaria

Ye una menacia a la sidre y a la mesma supervivencia d’Asturies, por supuestu, pero centrándomos no que mos ocupa –la sidre- esti auténticu éxodu de la mocedá asturiano (50% nos postreros 20 años, según acabo lleer en La Nueva España) supón que’l mercáu potencial de la sidre vióse amenorgáu d’una forma único na hestoria, darréu qu’a la perda de consumidores que constitúin los asturianos obligaos a emigrar hai qu’amestar l’avieyamientu poblacional, enfusándomos nuna franxa d’edá cuyu dinamismu social y capacidá de consumu ye muncho más amenorgáu. Ello ensin considerar la situación de paru y precariedá na que s’afaya la mocedá asturiano qu’entá se resiste –valientemente- a dexar que los espulsen de la so casa.

Lo peor ye que, en cuentes de poner fin al procesu de desindustrialización sistemática y la destrucción del nuesu texíu sociu-económicu y con ello revertir esta sangría, sigue ufiertándosemos como alternativa la repoblación del nuesu país con emigrantes. Emigrantes de primera –los llamaos nómades dixitales y turistes con segundes residencies- y de tercera –los que se supón vendrán faer de camareros a los primeros-.

Seya como fora, y siendo’l consumu de sidre un factor arreyáu dafechu al sustrato cultural asturianu, esta sustitución poblacional, amás de ser insuficiente –los emigrantes busquen territorios con meyores espeutives de vida que les qu’anguañu puen atopar n’Asturies- supón un procesu d’aculturización que se va ver espeyáu nos cambeos de manera y tipu de consumu de los nuevos asturianos, colo que les mires pa la sidre van ser entá peores: nun se trata namás de que la sidre pierda mercáu potencial por desapaición física de los sos consumidores, sinón que se pierde’l mesmu mercáu residual de resultes del so progresivu alloñamientu de les pautes culturales asturianes.

Dicho lo cualo, y como quiera qu’entiendo que les polítiques del Estáu español p’Asturies nun van variar, sinón qu’entá van dir acentuándose nun futuru prósimu, y buscando una perspectiva positiva pa esti difícil futuru nel que mos asitien y sobro’l que difícilmente podemos incidir, ocúrrenseme dos alternatives:

  • Potenciación de la cultura asturiana en xeneral y de la de la sidre no que mos toca –sidrocoles, talleres de mayáu, concursos de sidre casero, cursos y concursos d’echaores…- de tala miente que podamos integrar a los que vengan y paliar no posible l’aculturización de les nueves xeneraciones.
  • Diversificación del productu, afayándolu a les nueves tendencies y faciéndolu más accesible pa los nuevos consumidores. Ello ye, competir nel mercáu de les cerveces y nel de los vinos de calidá, darréu que los consumidores que nun comparten la cultura asturiana de la sidre difícilmente van afaese a les formes de consumu de la nuesa sidre tradicional, tal como vemos colos turistes qu’alleguen al nuesu país y qu’en tomando una botella sidre ente ocho y entretenese sacando semeyes y vidios al echaor, acaben pidiendo pa consumir vinu o cerveza.

Prestaríame poder tresmitir meyores espeutatives, sé que se ta faciendo enforma nestos dos campos qu’apunto, sé que los llagareros tán trabayando enforma y bien, que la DOP foi un pasu fundamental pal futuru de la sidre asturiano, qu’hai iniciatives como la Rede Europea de Ciudaes de la Sidre que van suponer un auténticu revulsivu nel panorama sidreru asturianu. Espero que se consiga –dempués d’años y años d’inxustificable retrasu- la declaración pola Unesco de la cultura asturiana de la sidre como Padremuñu Inmaterial de la Humanidá, creo que ye inaplazable l’aprobación d’un Plan Estratéxicu de la Sidre y, sobromanera, teo enfotu na capacidá d’asturianes y asturianos de sobrovivir nestes y peores circunstancies.

De fechu la nuesa mayor garantía somos nós mesmos, la capacidá d’aguantar y reinventamos, y siguir siendo nós mesmos, cola nuesa sidre siempres presente.

Marcos Abel Fernández Marqués

(Visited 2.597.657 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies