Cellebraráse en Xixón na Sidrería La Montera Picona de Ramón.
LA SIDRA.- El prósimu sábadu 16 de marzu llevaráse a cabu la XI edición del concursu Meyor Primer Sidre L’Añu, ún de los concursos más importantes del país en númberu participantes, y únicu na so especialidá: la primer sidre de la mayada de 2023, ensin trasegar.
El certame, entamáu pola FUNDACIÓN ASTURIES XXI, tendrá llugar na sidrería xixonesa La Montera Picona de Ramón..
La preseleición tendrá llugar el sábadu 16, a les 12:00 hores y nella escoyeránse les 5 sidres finalistes.
La final tendrá llugar el miércoles 20, a les 19 hores cola sidre preseleicionao pa, una vuelta sumaes les puntuaciones, dar el veredictu final y los premios a les sidres ganaores.
L’asistencia a les deliberaciones sedrá abierta al públicu, y al términu del concursu los asistentes que lo deseyen podrán prebar la sidre clasificao..
El xuráu tará presidíu por Manuel Busto y pal serviciu d’echáu cuntaráse colos echaores de La Montera Picona de Ramón, que participen davezu y con perbonos resultaos nel Campionatu Oficial d’Echaores d’Asturies.
La sidre premiao sedrá la oficial de la XIV Primer Sidre L’Añu, la espicha más grande d’Asturies que marca l’entamu de la temporada sidrera.
El premiu a la Meyor Sidre L’Añu ye l’únicu concursu que tien como protagonista la sidre sobro la madre, ensin trasegar y que tien retribución económica -1.000 euros en sidre-. Per esta xida posicionóse como ún de los concursos de referencia de la nuesa bébora tradicional, siendo’l segundu en cuantes a númberu de llagares participantes.
Dende hai 15 años LA SIDRA y la Fundación Asturies XXI escomenzaron a trabayar pola recuperanza de la sidre ensin trasegar, que práuticamente desapareciere del mercáu pola industrialización de los llagares y l’aplicación xeneralizada de los trasiegos. Ca vuelta son más los llagares que s’animen a comercializar esta triba de sidre y que participen nesti certame.
