Inicio > Eventos > Vicente Díaz sedrá’l pregoneru de la XIII Primer Sidre L’Añu
EventosPSLA

Vicente Díaz sedrá’l pregoneru de la XIII Primer Sidre L’Añu

El cantante Vicente Díaz, autor del popularísimu canciu ‘Qué tien esta sidrina’, rializará esti xueves 6 d’abril el pregón col que se nagurará la XIII Primer Sidre L’Añu, que va cellebrase nel Muséu del Pueblu d’Asturies del 6 al 9 d’abril .

LA SIDRA.-

LA SIDRA.- Na presentación participaron Marcos Abel Fernández, presidente de la Fundación Asturies XXI, Xuacu López direutor del Muséu del Pueblu d’Asturies, Manuel Busto, presidente del xuráu del Concursu a la Meyor Primer Sidre l’Añu, Falo Caldones, encargáu de les actividaes d’arruelu pa la reciella y Pedro Baldó, del llagar El Duque, comu representante de los llagareros participantes. Anque se cuntaba cola presencia de Vicente Díaz, autor de “Que tien esta sidrina que sabe tan bien” y pregoneru d’esta edición de la PSLA, cuestiones personales torgáron-y finalmente asistir al actu.

La primer intervención foi la de Marcos Abel Fernández, presidente de la Fundación Asturies XXI, que definió esti eventu comu una espicha tradicional de primavera, onde la xente va prebar la sidre acabante de facer,  pero un pocu “al revés”,  ya que nesti casu en llugar de desplazase a los llagares traese la sidre d’alredor de cuarenta llagares al mesmu sitiu pa que puea prebase, compaxinando esta preba con actividaes de tipu cultural, llúdicu y recreativu, qu’esti añu incluyirán, pente otres, un karaoke sidreru, un concursu amateur d’echar sidre, tasties guiaes de sidre, el ya tradicional concursu sidre casero, talleres d’echar sidre, actividaes pa la reciella y la presencia de Salvador Ondó, ganaor del Campeonatu d’Echar Sidre, tou ello acompangao de la música de la Banda Gaites el Gumial, ganaora de los premios AMA d’esti añu na categoría de gaites. Como novedá mencionó tamién la entrada gratis a tolos qu’el domingu se presenten al Muséu en bicicleta.

Destacó tamién la  intención del eventu de tener en cuenta los intereses de la hostelería de Xixón, motivu pol que preslla a les nueve, convidando a seguir la fiesta nes sidreríes de la ciudá, qu’esti añu súmase al eventu ufriendo dellos establecimientos una segunda botella de sidre de baldre cola presentacion del vale que s’entregará a la entrada de la PSLA

La siguiente intervención foi la de Xuacu López, que resaltó el compromisu del Muséu del Pueblu d’Asturies na conservación del padremuñu sidreru, comu elementu fundamental de la cultura asturiana, añadiendo que la Primer Sidre l’Añu ye un complementu perfechu al permitir  esfrutar en vivo d’esi padremuñu.

Manuel Busto, presidente del xuráu del Concursu de la Meyor Primer Sidre l’Añu, cuya primera fase tuvo llugar a continuación de la presentación, desplicó el furrulamientu del mesmu y destacó l’interés turísticu de la PSLA, una puerte a la cultura sidrera pa tou’l que s’avere a Xixón nestes vacaciones.

Pel so lláu, Falo Caldones, encargáu de les actividaes d’arruelu pa reciella resaltó l’ambiente familiar y la importancia que se da na PSLA a les actividaes pa los rapacinos: talleres de facer cestos, carreres de sacos, tiru cuerda, mayada de sidre…

Preslló l’actu la intervención de Pedro Baldó, quien destacó’l valor añadíu de dar la posibilidá de prebar sidres que nin siquiera son conocíes pola xente y que representen la riqueza y variedá de la sidre asturiana, nun tiempu en que na mayoría de sidreríes s’alcuentren siempreslos mesmos palos de sidre.

La Primer Sidre l’Añu, entamá pola Fundación Asturies XXI en collaboración cola revista LA SIDRA, cuenta cola collaboración del Ayuntamientu Xixón, la Conseyería de Mediu Rural y la Caxa Rural de Xixón y abrirá les sos puertes el xueves 6 d’abril cola naguración que tendrá de pregoneru a Vicente Díaz.

 

PROGRAMA / XIII PRIMER SIDRE L’AÑU / SIDRACRUCIS / XII ASTURIANADA Y SIDRE / CONCURSU DE SIDRE CASERO / PROGRAMACIÓN INFANTIL /TASTIES

¿QUÉ YE’L SIDRACRUCIS? / ¿EN QUÉ CONSISTE? / PERCORRÍU SIDRACRUCIS’23 / VIDIOS Y SEMEYES

 

(Visited 2.601.569 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies