Inicio > Chigres > Moción de FORO Asturias en defensa del seutor de la sidre
ChigresLlagares

Moción de FORO Asturias en defensa del seutor de la sidre

Adrián Pumares anuncia la presentación al Plenu la Xunta Xeneral d’una Moción pa que’l Gobiernu asturianu “dea al seutor de la sidre la importancia que rialmente merez”

LA SIDRA.- El Plan Estratéxicu del seutor de la mazana y la sidre n’Asturies, la puesta en marcha d’una llínea de sovenciones qu’aíde a retirar de los llagares les sidres naturales más antigües y de menor calidá, l’aplicación gradual de la obligación d’inscripción de los pumareros nel REXEPA, y la implementación de nueva ufierta formativa rellacionada col seutor de la sidre, son les principales propuestes.

El secretariu xeneral y voceru de FORO Asturies na Xunta Xeneral, Adrián Pumares, acompañáu del voceru del Grupu Municipal de FORU nel Conceyu Xixón, Jesús M. Salvador, anunció en rueda prensa, en visitando’l Llagar Trabanco, la presentación d’una Moción en materia de desendolcu rural ya industries agraries y, más en concretu, sobro la situación del seutor llagareru de resultes de la cris de la COVID-19. Sigún Pumares, “el prósimu miércoles FORO Asturies va presentar énte’l Plenu de la Xunta Xeneral una Moción pa que’l Gobiernu asturianu dea al seutor de la sidre la importancia que rialmente merez.

El dirixente forista esbilló los puntos recoyíos na iniciativa forista, afirmando que “tien d’actualizase y ponese en marcha de manera urxente’l Plan Estratéxicu del seutor de la mazana y la sidre n’Asturies’, cuntando pa ello colos axentes implicaos y encetando, ente otres cuestiones, la comercialización y el preciu d’esti productu”. Nesti sen, Pumares recordó que “a finales del añu 2018, la entós direutora xeneral de Desendolcu Rural afirmaba que se taba trabayando en conocer cuáles yera les necesidaes, faltes y previsiones del seutor pa ellaborar dichu plan”.

El voceru de FORO Asturies defendió que “consideramos imprescindible poner en marcha una llínia sovenciones qu’aíde a retirar de los llagares les sidres naturales más antigües y de menor calidá, collaborando asina a la meyora del productu y facilitando la compra de mazana asturiana”. Pumares fixo fincapié en que “el 2021, al ser añu impar, va ser un bien bon añu pa la collecha de mazana, polo qu’hai qu’aplicar midíes que dexen sacar de los llagares la sidre más antiguo”.

En rellación cola obligatoriedá pa los pumareros d’inscribise nel Rexistru Xeneral de la Producción Agrícola (REXEPA), Adrián Pumares sollertó de que “hai numberosos pequeños productores de mazana que nun tán inscritos nesti Rexistru y, por tanto, si s’esixe la inscripción, esa mazana nun va poder ser mercada polos llagares”. Asina, afirmó que “en casu de nun aplicar de manera gradual la obligatoriedá d’inscripción nel Rexistru Xeneral de la Producción Agrícola (REXEPA) de los pumareros, munchos pequeños productores nun van poder vender la mazana a los llagares”.

El secretariu xeneral de FORO Asturies remató la so intervención afirmando que “énte los allarmantes datos de desemplegu que sufrimos na nuesa Comunidá Autónoma, nun podemos esbardiar denguna de les nueses oportunidaes, polo que tenemos d’apostar de manera decidida por implementar nel Principáu d’Asturies de nueva ufierta formativa rellacionada col seutor de la sidre”.

 

 

MOCIÓN ÍNTEGRA DE FORO ASTURIES

La Xunta Xeneral del Principáu d’Asturies encamienta al Conseyu de Gobiernu a:

PRIMERO.- .- Actualizar y poner en marcha, en collaboración colos axentes implicaos, el Plan Estratéxicu del seutor de la mazana y la sidre n’Asturies’, encetando, ente otres custiones, la comercialización y el preciu d’esti productu, darréu que son dos de los principales problemes  colos que cunten les sidres que s’ellaboren nel Principáu.

SEGUNDU.- Implementar una llínia de sovenciones qu’aíde a retirar de los llagares les sidres naturales más antigües y de menor calidá, collaborando asina a la meyora del productu y facilitando la compra de mazana asturiana, especialmente nos años de bona collecha.

 TERCERU.- Aplicación gradual de la obligatoriedá d’inscripción nel Rexistru Xeneral de la Producción Agrícola (REGEPA) de los pumareros, rializando una campaña de comunicación sobro esta obligación qu’evite situaciones d’imposibilidá de vienta de mazana asturiana per parte de los cosecheros.

CUARTU.- Estudiar la implementación nel Principáu d’Asturies de nueva ufierta formativa rellacionada col seutor de la sidre.

 

(Visited 1.192.966 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies