Inicio > Cultura sidrera > Los xueves son de Sidre DOP en Xixón
Cultura sidreraGastronomíaNoticiesXixón

Los xueves son de Sidre DOP en Xixón

38 establecimientos ufren tolos xueves del añu sidra de denominación acompangao d’una cazuela a precios especiales.

LA SIDRA.- Xixón ye una ciudá sidrera que cunta con una bayurosa historia na cultura de la sidre. Poro, dende’l Conceyu de Xixón, al traviés de Divertia, y Otea, hostelería y turismu n’Asturies, ponse en marcha un proyeutu pa dedicar un díi de la selmana a la sidre. Asina xurde Xueves de Sidre. Ca xueves, nel grupu d’establecimientos participantes promociónase la sidre con Denominación d’Orixe Protexida ufiertándola xunta una tapina a precios especiales. La presentación fue güei na casa de La Palmera de Xixón y cuntó cola presencia  del presidente de Otea José Luis Álvarez Almeida; el conceyal de Turismu, Esportes, Festexos y Xuventú de Xixón, Jesús Martínez Salvador; ya’l xerente de la DOP Sidre d’Asturies, Daniel Ruiz, ente más representantes del seutor hostelero y de l’Alministración.

Xixón tien un allugamientu privilexiáu, cunta con una montonera de llagares na redolada que presten enforma a tolos amantes d’esti oru llíquidu asturianu. Poro, quier dase-y puxu, n’especial a la Sidre DOP, y destina-y un díi de la selmana, los xueves, onde se beba sidre DOP y s’esfrute d’un piqueñu acompangamientu de cocina. Los acompangamientos son variaos: cazuela d’albóndigues de caza, oreya guisao, chipirones afogaos o ración de rabes, por poner unos exemplos.

La idega central que persigue esta iniciativa ye que, tolos xueves del añu, los establecimientos participantes tean a dimposición de los sos veceros una promoción de botella de sidrr DOP más un acompangamientu (cazuela o daqué asemeyao) que ca establecimientu considere más afayaízu p’acompangala. L’únicu requisitu ye que la ellaboración puea prebase na barra l’establecimientu, anque tamién pue ufiertase na mesa.

En Xixón, de magar d’esta iniciativa, los xueves esfrútase de la Sidre con Denominación. Poro, hai un motivu más pa salir a la cai y percorrer los establecimientos prebando dellos palos de sidre y les cazueles coles que s’acompanguen. Asina con una ruta improvisada los xueves van ser más gayoleros y más asturianos. Los que visiten Xixón por motivos d’arruelu o de trabayu van tener más cenciello conocer la cultura’l país.

Pa facilitar l’espardimientu de la iniciativa desendólcase una campaña de promoción con cartelos p’afitar nos restoranes participantes y tamién pegadielles identificatives y gastromapes col allugamientu de los establecimientos participantes col so horariu pa percorrer fácilmente les rutes de Xueves de Sidre.

Arriendes d’ello, tamién s’esparde con publicidá y na ueb d’Otea www.escapaasturias.com, onde hai una estaya pa Xueves de Sidra onde apaez una ficha de cada establecimiento participante, incluyendo tola información del sitiu, la sidre y la tapa o cazuela qu’ufre, el so preciu y la so xeollocalización  en  Google maps pa poder atopalu con toa facilidá. Asina resulta cenciello a los visitantes escoyer y averase al establecimientu que más-y pruya.

Caldía empléguense más les redes sociales pa conocer les actividaes de cualesquier ciudá. Xixón nun ye menos. Poro, Xueves de Sidrw quier impulsar les interaiciones con un concursu en Facebook sortiando un Menú de la Reconquista (menú de calidá rializáu con productos d’Alimentos del Paraíso, con DOP ya IXP y otres marques de calidá) ente los que faigan una semeya de cualesquier de les ellaboraciones que consuman en Xueves de Sidre, la xuban al Facebook d’Otea indicando’l nome del sitiu y compartiéndolo col hashtag  #JuevesdeSidra. D’últimes, ye preciso dar al “Préstame” na páxina de Facebook d’Otea. Con éses, en Xixón ca xueves faise un homenax a la Sidra DOP. Xixón curia los sos vezos y ufre una nueva oportunidá pa esfrutar de les sos cais y los sos establecimientos.

Participantes: Alberto, Bellavista, Cabañaquinta, Canteli, Caprichos De Gijon, El Diablicu, El Fartón, El Requexu, El Restallu, El Sauco, El Tendido, El Museo, Gijon, Guaniquey, La Cabaña, La Cabaña Del Santu, La Casona Jovellanos, La Galana, La Montera Picona De Ramon, La Tabacalera, La Terraza De Porceyo, Les Neñes, Los Campinos, Llagar De Begoña, Nueva Uría, Omnia, Parrilla Alberto, Parrilla Antonio, Parrilla Muñó, Parrilla Muñó Poniente, Parrilla Ramon, Pernambuco Café, Río Astur, Rubiera, Samara Café, Sotamar, Tierra Astur Poniente y Tropical.

(Visited 599.892 times)
Estíbaliz Urquiola
Bandullu enllenu coral contentu. Esta másima siempres m'acompangó. Como a munches y a munchos mos pasa, les mios primeres alcordances tan rellacionaos cola cocina de les mios güeles, que se dedicaron moral y profesionalmente a la cocina, amás del so trabayu na casa. Estudié periodismu y dempués de pasar por varios diarios, televisiones y emisores de radiu decidí que les mios grandes pasiones convivieren n'harmonía. Na Universidá Complutense de Madrid graduéme nel Cursu d'Espertu en Periodismu Gastronómicu y Nutricional. Gracies a ello entré a trabayar na revista LA SIDRA como redautora y agora intentaré llevar esta seición a ver que tal se me da. Pa min nun hai ná más prestoso que descubrir tapes, raciones, platos o postres en toa triba llugares. Dende va años fui apuntándolos nuna axenda, por si dacuandu me pedíen un encamientu. Bono, pos llegó'l momentu d'espublizales, eso sí, con toa la humildá del mundiu. Nun soi crítica gastronómica, anmás qu'esfruto asgaya xintando y bebiendo n'Asturies, el meyor país pa facelo. s primeros recuerdos están relacionados con la cocina de mis abuelas que se dedicaron moral y profesionalmente a la cocina, además de su trabajo en la casa. Estudié periodismo y después de pasar por varios diarios, televisiones y emisoras de radio; decidí que mis grandes pasiones conviviesen en armonía. En la Universidad Complutense de Madrid me gradué en el Curso de Experto en Periodismo Gastronómico y Nutricional. Gracias a ello entré a trabajar en la revista LA SIDRA como redactora y ahora intentaré llevar esta sección a ver qué tal se me da. Para mí no hay nada más satisfactorio que descubrir tapas, raciones, platos o postres en todo tipo de lugares. Dese hace años los he ido apuntando en una agenda, por si algún día me pedían una recomendación. Bueno, pues llegó el momento de publicarlas, eso sí, con toda la humildad del mundo. No soy crítica gastronómica, solo que disfruto un montón comiendo y bebiendo en Asturies, el mejor país para hacerlo.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies