Inicio > DOP Sidre d'Asturies > La DOP Sidre d’Asturies sigue xorreciendo
DOP Sidre d'Asturies

La DOP Sidre d’Asturies sigue xorreciendo

El volume d’entrega de contraetiquet3s nel añu 2022 de la Denominación d’Orixe Protexía Sidre d’Asturies cífrase en 4.325.000 precintes, lo que supon un 6% de xorrecimientu con respeutu al 2021. El valor comercial de la sidre certificao como Sidre d’Asturies ye superior a los 5 millones d’euros.

LA SIDRA.- La marca de calidá diferenciada DOP Sidre d’Asturies recuperóse de les repercusiones causaes pola COVID-19, teniendo en cuenta qu’el 82% de les vientes de la sidra natural tradicional efectúase por mediu de la canal hostelera. Estos dos años anteriores los establecimientos tuvieron que convivir con grandes llimitaciones como la prohibición del usu de la barra y l’amenorgamientu de meses, aforos y horarios que torgaron consumir con total normalidá. La sidre natural d’echar ye una bébora social, ye dicir de compartir, y por ello na actual coxuntura la so vulnerabilidá ye mayor qu’otra triba consumiciones.

Ca vegada hai una mayor aceptación del consumu de productu con denominación d’orixe, gracies al aumentu de la sensibilidá de el consumidores alrodiu a productos caltenibles y de cercanía, de kilómetru cero y de calidá, como lo ye la única sidre ellaborada con mazana 100% asturiana. La mayoría de llagares coinciden en que les vientes de la sidre DOP respeutu a la sidre común aumentaron considerablemente lo que se debe ensin dulda a la promoción que se ta faciendo y a que les nueses sidres tán siendo mayoritariamente galardonaes nos estremaos festivales del país.

Amás del xorrecimientu en vientes de la sidre natural tradicional n’hostelería (82%), destaca l’aumentu de vientes a nivel estatal fasta’l 6 %. Les sidres naturales d’espolleta escayeron un 13%, según les contraetiquetes solicitaes polos llagares, fasta les 134.000. Destaca’l xorrecimientu en tienda propia del 4% al 6%.

Dende la DOP Sidre d’Asturies son optimistes pa esti presente añu,  por cuenta de qu’a lo último podemos tornar a la normalidá absoluta y esperen otru xorrecimientu en vientes de la Sidre d’Asturies.

El Conseyu Regulador tien como oxetivu amás del control y la promoción, defender marcar ‘Sidre d’Asturies’ y tan solo puede llevar “la etiquetina” si ye DOP. Esta mención ye la única que garantiza que pasó unos estrictos controles de calidá y que la mazana ye asturiana. El Conseyu Regulador ye l’únicu organismu que certifica l’orixe y la calidá de la Sidre d’Asturies.

“El Conseyu Regulador de la DOP Sidre d’Asturies, dientro d’alimentos del paraísu, ta faciendo un gran trabayu de promoción y les resultancies d’estos años son frutu del trabayu rializáu”, destacó la direutora xeneral de Desendolcu Rural y Agroalimentación, Begoña López, demientres la presentación de los datos oficiales.

Pela so parte, el presidente del Conseyu Regulador, Guillermo Guisasola, fixo fincapié nel valor que tien la diferenciación d’esti productu al respeutive de los que nun tán amparaos pola Denominación d’Orixe Protexía. “A pesar de toos estos años, entá hai muncha xente, inclusive profesionales de la hostelería, que nun saben inda lo que ye Sidre d’Asturies. Inclusive hai profesionales del sector ellaborador que, con o ensin mala intención, entienden que puen utilizar esa denominación-proteición o evocación pa cualisquier productu. Dende’l Conseyu Regulador trabayamos en poder formar ya informar de la importancia qu’ello supon”, espresó.

 

DATOS DOP SIDRE D’ASTURIES:

A 31 d’avientu de 2022, el Conseyu Regulador DOP Sidre d’Asturies compónenlu:

33 llagares, 376 pumareros, 821 pumaraes y 944 hectáries inscrites.

En 2022 apurriéronse 3.252.731 kilogramos de mazana con destín a DOP (cifra n’añu par) un 11,5 % más que va dos años y ellaboráronse 2.331.650 llitros comparaos colos 6.107.056 llitros del añu anterior.

 


(Visited 2.445.932 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies