Inicio > Tasties > Esperimentando con combinaos de sidre
Tasties

Esperimentando con combinaos de sidre

Zusmiu de sandía y sidre natural ye una fresca combinación, pero siempres, eso sí, con moderación… un vasu pal calor ye perafayaízu

LA SIDRA.- Vamos ver, tamos d’alcuerdu en que la sidre natural ye una de meyores bebíes qu’esisten, la más pa cientos de miles d’asturianos. Pero tamién ye verdá que nos postreros años son dellos los especialistes que siñalen qu’hai qu’abrir nueves llínies de consumu paqu’el nuesu productu más identitariu llegue meyor tantu a quien nun tán trataos nella como a les nueves xeneraciones.

Una d’eses propuestes pasa por integrar la tantu na gastronomía, como en cócteles y combinaos. Y d’estos postreros güei dexámos-yos una propuesta, curiosamente encamentada por asturianos qu’agora s’atopen n’América Llatina.

Siñalen dende l’alloñanza que, como en munches ocasiones la sidre natural que llega a aquellos llares nun ye “la meyor”, tán afayando –como yá lo fixeren los nuesos antepasaos cola sidre gasificao– nuevos métodos de consumu. Y encamienten… ¡la sidre con zusmiu de sandía!

Consiste en bater una rodaxa del citáu frutu fasta consiguir un zusmiu con tou y la so magaya. Sirvilo nun vasu de sidre fasta la tercer parte, amestar un pocu d’augua con gas y depués un culín de sidre natural. Finalmente estrumir un pocu de llima percima, y si se quier, pue incluyise un xelu piqueñu, si ye que’l zusmiu de sandía nun ta fríu, porque sedríe lo suyo. Eso sí, recuerden qu’esti amiestu nun se debe beber en muncha cantidá, una y bones esta fruta ye pesada pal estómadu y nun ye bien recomendable entemecela con alcol. D’ende que la sidre, pola so baxa graduación, seya perafayaíza pal combináu. Pero, repitimos, ensin pasase, un vasu ye la midía.

¿Cómo surde esta idea? Pos na América hispana ye común combinar diverses frutes como’l mangu, la granada, la mazana o la mesma sandía con zusmiu de llimón y un pocu sal para sirvilos como ‘aperitivu’. En México inclusive se-y amiesta un pocu de picante en polvu. De manera que la sidra, pola so acidez, fae una bébora perfecho para permediar el dulzor del zusmiu de sandía. Amás, si amestamos un plizcu de sal de mar al amiestu, realza’l so saborgu.

(Visited 656.858 times)

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies