Inicio > Eventos > Ésitu d’asistencia na tastia abierta del XII SISGA
EventosSISGA

Ésitu d’asistencia na tastia abierta del XII SISGA

Güei tendrá llugar la naguada entrega de los Premios SISGA, nel marcu del Brunch de Gala que se cellebrará nel Restaurante El Duque

El SISGA entamó ayeri la xornada con una perinteresante charra sobro les Denomaciones d’Orixe, na que de la mán de Guillermo Guisasola, presidente de la DOP ‘Sidre d’Asturies’ y Damià Deas, presidente AECAVA  se fizo un repasu a la emportancia, hestoria, actualidá y retos futuros de les DOP, comparando la situación de la denomación asturiana cola del cava, que tien muncho más camín fechu, al cumplise los cuarenta años dende la consecución del sellu DOP.

A les doce’n puntu, malpenes s’abrieron les puertes, entamaron a entrar los primeros visitantes a la tastia abierta onde, copa en man, percorrieron los puestos de los llagares presentes, non solo tastiando sinón, sobre tou, informándose sobro les carauterístiques y estremaos procesos de les sidres presentes. Non solo los llagares foriatos sosprendieron, los asturianos tamién apurrieron al SISGA un bon catálogu de novedaes sidreres y de productos que, seique lleven tiempu nel mercáu, comu la sidre de xelu, la de botellín, llata o los vermús de sidre, siguen siendo poco conocios pente la población asturiana. L’afluencia de xente nun aparó y fasta les nueve de la nueche la Sala Noega del Hotel Rey Pelayo continuó ferviendo de sidreros.

Ye de destacar qu’a esta tastia non solo acuden persones afalaes pola curiosidá ya’l gustu pela sidre, sinón que ye ún de los sos finxos cimeros que seya un puntu d’alcuentru pente los llagares y los esportaores, importaores, distribuidores y restauradores, siendo ello que’l SISGA ye tamién un ñeru de relaciones comerciales internacionales que dan sonadía perdayuri a les sidres asturianes.

Güei fina’l XII Salón Internacional de les Sidres de Gala, con un brunch compuestu de delicatessen especialmente escoyíes p’acompangar a delles de les sidres presentes nel Salón, amosando la compatibilidá de la sidre cola alta cocina. Pedro Baldó, del Restaurante El Duque, ye’l responsable d’escoyer y preparar esti menú, nel qu’anunció que s’alcontrarán delles versiones perespeciales de recetes rescataes de la tradición asturiana.

A lo llargo la mañana dirá faciéndose entrega de los galardones de los Premios SISGA, un de los momentos más esperaos polos llagareros de los estremaos países.


(Visited 2.445.660 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies