Entamu
Pocos meses hai tan dinámicos como ta siendo esti.
La clausura trunfal del XIII Salón Internacional de les Sidres de Gala, el más completu en conteníu y actividaes, y el de mayor y más plural participación de la hestoria, complementóse cola firma, nel Salón de Recepciones del Conceyu de Xixón, del protocolu d’adhesión a la Rede Europea de Ciudaes de la Sidre –RECS-, nel que participaron representantes del Gobiernu de Madeira, del Cabildo de Tenerife, de la República Checa, y de Conceyos de Francia, Italia, del Estáu español (Kuartango y Valleseco) y d’Asturies (Xixón, que foi la ciudá anfitriona, Cangues d’Onís y Nava).
Trátase d’un fechu históricu de por sigo, nel qu’Asturies, Xixón concretamente, actúa como motor del necesariu procesu d’internacionalización de la sidre, de potenciación de les sos capacidaes y de reivindicación de los sos drechos a nivel européu, coles mires d’una llexislación común europea que permita a la mazana y la sidre gociar de sofitos similares a los qu’esfruten la uva y el vinu.
Fecho lo más difícil, ponese d’alcuerdu nos oxetivos y empecipiar el camín, tolo demás va venir pasu ente pasu, la progresión ye cierta y a los pocos díes de conocese la constitución d’esta RECS yá fueron enforma los conceyos, mancomunidaes y rexones qu’amosaron el so interés en formar parte del mesmu. Siguirá habiendo noticies, y van ser bones.
D’otra miente esti foi un mes nel que la sidre casero trunfó dafechu, los concursos y eventos multiplíquense, y lo que ye más importante, ca vegada con mayor participación de llagares caseros y mayor atención del públicu. Ye un fenómenu impresionante, únicu, nel que se pon de manifiestu l’enorme rixu de la cultura asturiana de la sidre. Y la final va ser el 22 d’ochobre en Villaviciosa. La cosa promete.
Y tamos de nuevu con Xixón de Sidra, que llega con anovaos ímpetos. Vien d’anunciase la segunda edición de ‘Mayando con Sidraturismu’. Yá se ta pañando la mazana y empecipiando a mayar.
scomienza de nuevu’l ciclu de la sidre y sí, les coses van bien, colos inevitables problemes y dificultaes, pero avanzando, col enfotu de qu’esti añu la sidre entá va ser meyor que l’anterior y que vamos esfrutala como se merez.
Pa recibir el PDF fai falta tar dáu/da d’alta nel whatsapp de LA SIDRA
