Inicio > Sin categoría > Entamu LA SIDRA 177 (setiembre’18)
Sin categoría

Entamu LA SIDRA 177 (setiembre’18)

Entamu

Escomienza setiembre soleyeru, y la perspeutiva inmediata del Salón Internacional de les Sidres de Gala –SISGA-, que na so ochava edición garra nueu puxu multiplicando la presencia internacional y l’espaciu d’esposición que representa la Xornada de Tastia Abierta que va dar la posibilidá al gran públicu d’esfrutar de la sidre de más d’una docena países de tol mundiu, esperiencia única que da idega de la bayura y diversidá del panorama sidreru internacional.

Con esti Salón, la sidre pónse de llargu, y preséntase y defende con toa dignidá como productu de calidá dignu pa compartir y competir per espacios con cualisquier otra bébora de carauterístiques asemeyaes, como pue ser el vinu o’l xampán, al empar que reivindica la necesidá d’un marcu llexislativu européu que determine daqué tan evidente como que la sidre ye’l resultáu de la formientaura del mostiu de la mazana, y que permita a los empresarios del seutor tener acesu a les mesmes aídes de les que gocien los sos homólogos del vinu.

Importantes por demás son les pallabres de Mª Jesús Aguilar, nueva direutora xeneral de Desendolcu Rural y Agroalimentación, que na so primer intervención en dichu cargu reconoció la necesidá d’un Plan Estratéxicu de la Sidre, desixencia que vinimos rializando reiteradamente dende estes páxines nos postreros tiempos ensin topar ecu nin respuesta pol so predecesor nel cargu, Jesús Casas, cuya xestión dexa un universu de bones pallabres y una falta dafechu de concreción de les mesmes. Ye enforma’l llabor pendiente que-y queda per delantre a Mª Jesús Aguilar: la etenramente aplazada presentación de la candidatura de la cultura sidrera asturiana como Padremuñu Inmaterial de la Humanidá énte la Unesco ensin dir acullá, y l’imprescindible Plan Estratéxicu de la Sidre cuya evidente necesidá yá reconoció, y esperamos guíe la so xestión nel cargu.

Asina mesmo, siguimos a vueltes cola botella sidre tradicional, indiscutible padremuñu asturianu, cuya defensa resulta especialmente complicao dao la llexislación vixente, y la falta d’implicación d’un “Principado” a quien-y correspuendería lliderar la so reclamación como activu padremuñal y económicu de la totalidá del seutor sidreru asturianu.

A lo cabero, la solidaridá y el compromisu del mundiu la sidre tamién quedó espeyao na espicha de la Sidre d’Asturies DOP en solidaridá cola Fundación Sandra Ibarra frente al cáncanu. Una iniciativa qu’honra a quien la entama y a quien participa nella.

(Visited 711.679 times)

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies