Güei domingu díi 5 d’agostu tuvo llugar el cimer de los eventos que tienen llugar demientres el Festival intercélticu d’An Oriant (Lorient) en Bretaña. Aparte la bayura conciertos, amueses de cultura de les naciones celtes y gastronomía, el pasucáis rellumó gracies al bon tiempu.
LA SIDRA.- Y ye qu’equí n’An Oriant au desplazóse la delegación asturiana de LA SIDRA nun fai precisamente mal tiempu. Un sol de xusticia nun acobardó a los munchos grupos de baille tradicional y bandes de gaites que vístense comu ca añu colos sos traxes tradicionales pal Gran Pasucáis de les Naciones Celtes.
Estes naciones representaes nel Fesitval foron Acadia, Asturies, Bretaña, Cornualles, Gales, Galicia, Escocia, Irlanda, ya Isla de Man.
Les bandes de gaites d’Escocia foron daqué digno de ver, siguíes poles irlandeses, galeses (país d’honor nesta edición), asturianes y les numberosísimes “bagads” bretones. Diches bandes de gaites tan sofitaes mediante patrociniu por llagares bretones, que xuntu cola cerveza Lancelot, amuesen el so puxu pola cultura bretona. De la representación asturiana les bandes de gaites d’El Gumial y la Banda Gaites Villaviciosa – El Gaitero, xuntu col grupu baille San Félix de Candás, foron los responsables d’esparder la nuesa cultura y comu bien siendo vezu, fixeron que-y prestare asgaya al públicu bretón ya internacional que s’averare a ver el pasucáis.
Una bona amuesa de bayura cultural de les destremaes naciones celtes, tantu coles coses que compartimos en común comu lo que mos destrema, que da llugar a un crisol de calter internacional ya de xunidá de los pueblos.
L’espíritu celta ta nidiu qu’entá sigui vivu, y per munchu tiempu.
