Inicio > Gastronomía > El bonitu, el sal del branu
Gastronomía

El bonitu, el sal del branu

Ensin dulda ún de los reis de la mar y del branu, con una impresionante versatilidá na so preparación: al ayu, con tomate, a la chapa, a la parrilla, en rollu, en marmita y hasta n’ensalada. ¿Y qué dicir de la ventrisca?

El bonitu ye’l platu estrella del branu nes sidreríes asturianes.

 

Sidrería La Escollera
San Xuan de l’Arena, Sotu’l Barcu

Fusión de creatividá y sabor

La Escollera ufierta una variedá escepcional de platos de bonitu que van allantar los tos sentíos. Dende’l clásicu rollu bonitu fasta’l tradicional marmitáu de bonitu, el bonitu a la chapa, cocináu a la sidre o la tentadora ventrisca, La Escollera tien la receta afayaíza pa ti.

Ún de los sos platos estrella ye’l cachopu, delicia difícil d’atopar n’otros llugares. Pero la innovación culinaria nun se detien ende. El bonitu estilu Calea ye una receta especial, tresmitía de xeneración en xeneración dende’l so güelu, que destaca pola so preparación con tinta de calamar.

 

 

Sidrería Santarúa
C. del Carlos Albo Kay, 18, Candás

Somórguiate nos saborgos de la mar

Les especialidaes de bonitu de Santarúa van tresportate a un mundiu de saborgos inresistibles. Maxina’l primer taragañu d’una ensundiosa ventrisca a la chapa, acompañada de pataques, pistu y ensalada. ¿Préstatei? Pos la maxa nun acaba equí. Santarúa llevó’l rollu bonitu a otru nivel, al presentalu en formatu piqueñu, como croquetes, coronaes con llagostinos al ayu.

Tampoco nun puedes perdete la ventrisca al fornu con zamburiñes, los tacos de bonitu con llagostinos al ayu o’l bonitu a la chapa. ¡pues perdelo!!

 

 

Bar Domingo
A. Palacio Valdés, 2, Candás

Saborgosos bocaos de bonitu

La carta del Bar Domingo esplega una inresistible seleición de platos de bonitu. La so ventrisca, xugosa y delicada, revela una testura tienra y un gran saborgu. Otra de les sos especialidaes son los tacos flambiados.

Pero, ensin dulda, el so platu estrella ye’l rollu bonitu. Esti manxar, que ganó l’almiración de los sos veceros, convirtióse nun emblema de la casa. El so secretu anicia nuna preparación cuidadosa y ensundiosa. Les recetes ellabórense con bonitos d’un pesu máximu de 6 quilos, pa garantizar una esperiencia gastronómica única, yá que el so saborgu ye más intensu y deliciosu.

 

 

Sidrería Asturias.
Dr. Aquilino Hurlé, 36, Xixón

Recetes especiales onde’l bonitu cobra vida

Col so fundador al frente, que lleva dende los ocho años trabayando nel mundiu la sidre, la Sidrería Asturies ufierta esperiencia y variedá nos sos platos de bonitu y ye l’arguyosa ganadora de La Cazuelina del añu pasáu.

Los sos platos estrella son la ventrisca a la chapa, el salpicón y el bonitu n’escabeche, con una receta especial y única, inventu de la casa. Con una habilidá especial para resaltar el saborgu del bonitu, va encantate’l so llombu al ayu, acompangáu con pistu, o la raxa bonitu, un platu tradicional bien saborgosu.

 

 

Sidrería El Lavaderu
Pl. Periodista Arturo Arias, 1

Nueves formes d’esfrutar del  bonitu

Si quies esfrutar la temporada del bonitu d’una manera bien especial, nun pues dexar de dir a El Lavaderu.

Amás de les recetes avezaes de tacos de bonitu, rodaxes o salpicón, equí vas atopar una receta única: les llasques de bonitu con mueyu mariscáu.

Nesti platu, el bonitu cocinase afogáu a baxa temperatura, calteniendo’l so saborgu natural. El mueyu mariscáu amiesta un toque bien sosprendente. Otra receta que nun pues perder ye’l escalope de bonitu, pa la qu’utilicen llasques daqué más grueses.

Nun podemos dexar de mentar el tartar de bonitu, que bramente va faer les delicies de los gourmets.

Sidrería Los Pomares
Av. de Portugal, 68. Xixón

Saborgos auténticos y tradición

Si te gusten los tacos y rodaxes de bonitu o la deliciosa ventrisca, equí vas atopar una llacuada de sabores, que vas poder acompangar con un saborgosu pistu. Amás, cunten con una ufierta de recetes bien especiales que van encantate.

Los sos platos estrella son los tacos flambiados, una receta única de la casa, y el rollu bonitu guisáu con mueyu tomate. La preparación d’esti platu implica enforma trabayu y dedicación, pero la resultancia final ye un bonitu increyíblemente xugosu que destaca pola so autenticidá y saborgu inigualable.

En Los Pomares, el bonitu utilizáu siempres ye de la costera qu’entra nel díi. Esto garantiza la frescura y calidá de ca platu que sirven.

 

La Montera Picona de Ramón
Saavedra, 3. Xixón

Saborgu y creatividá

La Montera Picona ye un parayísu culinariu pa los amantes del bonitu y ufierta una amplia variedá de recetes que van sosprendete.

El so platu estrella ye una auténtica xoya culinaria: los tacos de bonitu a la crema d’oricios sobro pataca panadera, acompangaos d’amasueles y llagostinos. Esta receta especial de la casa ufierta una combinación maxistral de testures y saborgos que van allantar el to paladar.

Pero eso nun ye too. Tamién pues inclinate pola ventrisca, los tacos afogaos, los tacos al ayu, l’arroz con bonitu, les rodaxes con pistu o’l bonitu a la crema cebolla, con una testura nidia y un saborgu deliciosu. De xuru que nun te enquivoques.

Pa recibir el PDF de la revista LA SIDRA fai falta tar dáu/da d’alta nel whatsapp de LA SIDRA


(Visited 2.561.518 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies