Inicio > Encamientos > 9 referencies pa una bona parrilla
EncamientosGastronomía

9 referencies pa una bona parrilla

El saborgu que dan les brases ye incomparable, les carnes ásense seliquín quedando tienres per dientru, pero cruxentes nel so esterior. Ensin dubia’l fueu realza’l so saborgu faciendomos naguar. Y entá más si compartimos estes riques ellaboraciones en compaña. Yá seyan de mariscu, pexe o carne, les parrillaes trunfen siempres na mesa.

Casa Julio, Parrilla-Sidrería. Xixón
¿Un homenaxe parrilleru?

Si esfrutamos cola carne, Casa Julio ye’l nuesu sitiu. Ufierten productos selectos de Angus, Vaca gallega o Xata asturiana. De la so completa carta destacamos el ‘Platu Parrilleru’ (costielles, criollu, morciella, churrascu, pitu al llimón); y el ‘Platu Parrillero Selectu’ (entrecot de güe, churrascu d’Angus y sollombu de xata). Atención a la ‘Parrillada Casa Julio que lleva xamón, chorizu y salchichón ibéricos; cecina de güe, calamares, croquetes, chipirones, costielles, churrascu y muncho más.

Sidre: Peñón, Contrueces y Villacubera.
Direición: Ríu Eo, 56
T. 985 165 280
Horariu cocina: 13:00 a 16:30 y de 20:00 a 00:30
Descansu: Nun preslla
Suxerencies: brocheta de gochu ibéricu con tacos de quesu provolone y mueyu de soya agriduz

FB Parrilla Casa Julio

 

 

El Carbayu, Sidrería-Parrilla. Xixón
Impresionante parrilla en Granda

Allugada na preciosa redolada natural de Granda, los veceros d’esta sidrería destaquen la rellación calidá/preciu de la so carta y menú. A la parrilla cunten con costielles, criollos, morciella matachana o sollombu de gochu, güe y xata. Tamién entrecot, llacón al caricote, quesu provolone y chuletón a la piedra. Too perbién tresnao pa esfrutar al másimu d’estos platos. Importante: cunten con una nueva terraza con enormes pantalles de televisión, aparcamientu y parque infantil.

Sidre: Menéndez, JR, y Trabanco d’Escoyeta.
Direición: Camín del Carbayu, 78
T. 985 137 907
Xefa cocina: Sandra Morán
Horariu cocina: 11:00 a 17:00 y de 20:00 a zarru
Descansu: Nun cierra
Suxerencies: Chuletón, corderu a la estaca (domingos y por encargu), llubina xabaz al fornu, bonitu del norte, callos caseros

 

El Prao del Sol, Chigre-Restorán-Chill Out. Xixón
Pa esfrutar del branu.

Un conceutu que trunfa. Esti restorán, chigre, chill out convirtióse n’un de los establecimientos más orixinales pa esfrutar del branu, una propuesta que s’estima dientro de la ufierta hostelera. La so llocalización ye inmeyorable una y bones atópase na redolada rural de Xixón, pero a escasos minutos de la ciudá. Y, poques gracies, la calidá de la so parrilla refréndenla tantu los sos veceros avezaos, como turistes. Amás cunta con actuaciones de música en direutu. La sidre qu’echen son Trabanco y Trabanco d’Escoyeta.

Direicion: Carretera de La Providencia 28-24
T. 985 132 082
Xefe cocina: Pablo Coto
Horariu cocina: Llunes a miercoles de 11:00 a 16:00 y de 20:00 a 24:00. Fines de selmana l’horariu ye continuu.
Descansu: Nun preslla
Suxerencies: Degustacion de carnes, vacio, picana, entrecot, costiella, chuleton, vaca rubia

 

 

El Saúco, Sidrería. Xixón 
Más de 40 años los avalen

Cuatro décades de trayeutoria n’una de les fasteres más simbóliques de la ciudá como ye’l Barriu la Sidre. ¡Y siempres ufiertando asaos y parrilla! Ensin dulda too ello ye garantía del so bon faer tantu en cocina como en serviciu de barra y restorán. Cunten con una parrilla especial que cocina carne y pexe dexándolos tienros y xugosos nel interior, y nel so puntu esautu per fora. La sidre qu’echen son Castañón y les DOP Val de Boides y Molín del Mediu.

Direición: Valencia, 20
T. 985 398 330
Xefes de cocina: Víctor Dos Reis y Pablo Sánchez
Horariu cocina: 12:00 a 24:00 hores
Descansu: Miércoles
Suxerencies: “cochinillo”, arroz con bugre, pexe y mariscu, cunten con cetária propia

 

 

Parrilla Muñó y Parrilla Muñó Poniente. Xixón 
Llugar de parrilla por escelencia

Dambes sidreríes son afamaes pola so parrilla lleña. A la materia primo d’alta calidá, amiéstase’l remangu de los sos cocineros a los caricotes. Les costielles son toa una tradición gastronómica na ciudá, pero tamién ufierten parrillaes pa dos, trés o más presones con carnes como secretu ibéricu, criollu, sollombu de gochu, pollu, chorizu colloráu, corderu, churrascu y entrecot. Coles mesmes ufierten una parrillada ‘Tierra y Mar’ qu’inclúi carnes y productos como gambes, chipirones o calamares.

Sidre: Cortina, Villacubera y Peñón.
Direición: Feijóo, 33 (Muñó) y Avda. Juan Carlos I, 42 (Muñó Poniente)
T. 985 336 080 (Muñó) y 985 317 286 (Muñó Pte.)
Xefa cocina: Inés Meana
Horariu cocina: De 13:00-16:00 y de 19:00-00:00
Descansu: Martes
Suxerencies: carne y pexe fresco

 

Cabañón, Llagar-Sidrería. Naves de Llanes, Llanes 
Un emblema del oriente

Tienlo too. De primeres, el magníficu alrodiu del oriente asturianu. La so sidre, Cabañón, foi reconocida en distintos certames. Amás, l’establecimientu ye práuticamente un muséu pola cantidá d’ellementos etnográficos qu’ellí atopamos. Y lo meyor ye la so gran parrilla de lleña na qu’ellaboren toa triba carnes. Por exemplu, Flewick Simental Alemana (vaques de 6 años con grasa de grau 4 o 5 bien infiltrada y más d’un mes de maduración en cámara esfrecida a 3° y un 70% de mugor). Ufierten ibéricos.

Direición: Naves de Llanes s/n T. 985 407 550
Xefe parrilla: Xacintu Vela
Horariu cocina: 13:00 a 16:00 y de 20:00 a 23:30
Descansu: Nun preslla en temporada alta
Suxerencies: escelente cocina casera asturiana como fabada, pitu caleya, bacaláu a la llanisca o unos cachopos espectaculares

 

 

Sidrería Alberto Brasa y Mar. Xixón 
Espertos en parrilla y en productu

¡Del caricote a la mesa! ye’l so llema y vaya que lo cumplen. Cunten cola meyor materia primo y tamién cola habilidá de bonos parrilleros. Ufierten carnes tan suxerentes como churrascu y picaña d’Angus, Txogitxu, chuletones de Vaca vieya, Bife arxentín, ente munches más. Tamién cunten con parrillaes pa dos, trés o cuatro presones. Tocántenes a pexe, ufierten llubina, rodaballu o pixín; y tamién tienen en carta pulpu, cogordes con xamón y quesu provolone a la parrilla.

Sidre: Peñón, Contrueces, Canal, y la DOP El Santu.
Direición: Decanu Prindes Pando, 8
T. 984 839 926
Xefe cocina: Alin Florin
Horariu cocina: De 11:00 a zarru
Descansu: Nun preslla
Suxerencies: pexe y carne a la parrilla

 

 

Parrilla Antonio I, Sidrería. Xixón 
Referente nel Barriu la Sidre

Esta sidrería ye un de los referentes del ‘Barriu la Sidre’ de Xixón, y en gran parte débese a la so parrilla. Na so carta atopamos costielles, criollu, matachana, entrecot, pitu al llimón, secretu ibéricu, quesu provolone, chuletones y chuletines de corderu. Amás tamién preparen a los caricotes distintos pescaos como chopa, llubina, pixín o bacalláu… Y tampoco falten tapes como la de gambes, chipirones, pulpu, muergos o zamburiñas. La sidre que tienen equí ye Canal, Arsenio, y les DOP Val de Boides y Val d’Ornón.

Direición: Roncal, 1
T985 154 973
Xefa cocina: Margarita Mosquera
Horariu cocina: De 13:00-16:30 y 20:30-00:30 h
Descansu: Nun preslla
Suxerencies: cachopu de la casa, tablón marineru, platu parrilleru, chuletón d’Angus

(Visited 640.022 times)

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies