Inicio > Sin categoría > Entamu LA SIDRA 192 (Avientu’19)
Sin categoría

Entamu LA SIDRA 192 (Avientu’19)

Entamu

Estes tienen de ser les navidaes de la sidre. Nun se trata namás de que la sidre tea presente en tolos nuesos eventos y cellebraciones, tenemos que procurar qu’esti añu seya la protagonista.

Protagonista a la hora quedar colos nuesos collacios y amigos pa cellebrar les fiestes, y protagonista nes nueses cases, cenes d’empreses y restu d’eventos festivos que conlleven les fiestes navidiegues.

Yá nun hai esculpia, disponemos de toa triba de sidres que puen afaese a cualisquier eventu o situación, dende la sidre tradicional fasta l’aguardiente de sidre, pasando poles estremaes sidres esplumoses –brut, semiseca, dulce- les sidres de xelu, de fueu, ya inclusu de botellín… toes elles d’una calidá enorme, talamente como quedó demostrao col ésitu de les sidres asturianes nel pasáu Salón Internacional de les Sidres de Gala –SISGA-.

Por eso, esti añu tenemos que dar un vuelcu a esos vezos que fueron imponiéndose de cerveces, vinos, caves y xampanes. Nestes cellebraciones tenemos una maraviosa oportunidá d’esfrutar y de revindicar la nuesa sidre; tamién de demostrar el nuesu asturianismu y de poner el nuesu granín de sable a la economía asturiana, precisamente agora cuando les previsiones nun son bones y anúnciasemos una prósima agudización de la debacle demográfica que sufrimos de resultes de tantos años de planificada desindustrialización y destruición del texíu sociu-económicu asturianu.

Ye precisu fortalecer el seutor sidreru asturianu. Remata l’añu y siguimos pendientes de que’l “Principado” presente un Plan Estratéxicu de la Sidre y la Mazana –PESMA-, tamién de qu’informe en que situación s’atopa la declaración de la candidatura de la cultura asturiana de la sidre a Padremuñu Cultural Inmaterial de la Humanidá pola Unesco…

Per otra parte esti añu toviemos una bona collecha de mazana, y son munchos los llagares que llegaron a avientu mayando. La sidre nos tinos y toneles va avanzando amodo gracies a les temperatures propies del iviernu, tresnándomos un feliz y bien sidreru añu nueu, tal como dende LA SIDRA queremos deseyar a toos los nuesos llectores; y lo dicho: ¡Estes tienen de ser les navidaes de la sidre!

 

 

 

(Visited 745.127 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies