Inicio > DOP Sidre d'Asturies > Salón Sidre d’Asturies 2022
DOP Sidre d'Asturies

Salón Sidre d’Asturies 2022

Esti martes 14 de xunu cellebróse nel Palaciu de Congresos del recintu Ferial Luis Adaro de Xixón, el Salón Sidre d’Asturies, entamáu pol Conseyu Regulador de la DOP Sidre d’Asturies. Trátase del mayor puntu d’alcuentru de profesionales del seutor sidreru: llagareros, productores, pumareros, distribuidores, hosteleros, etc.

LA SIDRA.- Esta xornada foi nagurada pol presidente del Conseyu Regulador, Guillermo Guisasola. “Queremos llegar a los cinco millones de contraetiquetes en 2022. Pidimos a los asturianos que la consuman”, aprofió Guisasola. El responsable de Mediu Rural de Caxa Rural d’Asturies, Javier Nievas, destacó’l compromisu de la entidá qu’elli representa colos seutores productor, ellaborador y comercializador.

Pela so parte, el presidente d’OTEA, José Luis Álvarez Almeida, incidió nel impulsu y sofitu que dende la patronal hostelera dan a esti productu. “Inculcamos a los hosteleros qu’esti ye’l camín. La sidre d’Asturies tien que ser la única sidre del mundiu onde la calidá y el respetu pol mediuambiente simbolícense nuna botella”, esplicó.

El tercer turnu pallabra foi pal direutor xeneral de Cultura y Padremuñu del Principáu d’Asturies, Pablo León, qu’incidió na importancia del procesu en cursu de la candidatura de la Cultura Sidrera Asturiana a Padremuñu Inmaterial de la Humanidá pola Unesco. Preslló’l turnu d’intervenciones istitucionales la direutora xeneral de Desendolcu Rural y Agroalimentación, Begoña López. “Llevamos enforma tiempu sofitando a toles DOP ya IXP, y esi esfuerzu vese compensáu. Anque nun mos conformamos. Vamos ameyorar la calidá y la formación en caúna d’elles, col oxetivu clavu d’afitar población nel mediu rural”, solliñó.

Tres la so intervención, tuvo llugar la entrega premios a les meyores Sidres d’Asturies del añu:

Sidre Natural Tradicional

–           Premio Oru: Quelo DOP

–           Premio Plata: Piñera DOP

–           Premio Bronce: Zythos, de Sidra Herminio

Sidre Natural d’Espolleta –

            Pomarina, de Valle Ballna Fernández (Grupu El Gaiteru)

Sidre Natural Calilstrao –

            Ramos del Valle, de Sidra Fran

L’actu istitucional remató con un actu especial nel que se desveló a la Embaxadora de la Sidre d’Asturies 2022. Anguaño recayó na periodista y actriz asturiana: Paula Prendes. “Yo soi bien asturiana. Acullá onde voi,intento treslladar los valores de la nuesa tierra. Espero que la Unesco nome a la cultura sidrera asturiana como padremuñu inmaterial de la humanidá”, manifestó.

(Visited 1.650.350 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies