Inicio > Cultura sidrera > ‘Princesa de Asturias’ na Fototeca LA SIDRA
Cultura sidreraFototeca

‘Princesa de Asturias’ na Fototeca LA SIDRA

Sidra Princesa de Asturias, ‘La Princesa de las Sidras’. Trátase d’un cartelu de metanes del sieglu pasáu onde s’espubliza tala marca rexistrada en 1918 y, nel momentu de la so impresión, propiedá de Perfecto García

LA SIDRA.- Esta nueva incorporación al depósitu museísticu de la Fundación Asturies XXI nel Muséu del Pueblu d’Asturies, y na fototeca LA SIDRA, trátase d’una cartulina con unes dimensiones de 24 x 33 cm y con impresión a cuatricomía nel anversu de la publicidá de dicha sidre; l’aviesu facilita información sobro lo que ye auguardiente, y la manera d’ellaborar “cups”, bébora daquella bien de moda.

La marca ‘Gran Sidra Champagne Sidra de Asturies’ tien el so orixe en 1918, de la man d’El Llagar del Nora, magar foi camudando de propietarios a lo llargo’l tiempu, y el  cartelu correspuendese cola dómina na que dicha marca pertenecía a Perfecto García.

A esti respeu puede atopase amplia información nel llibru’Patria de Sidra. La industria de la sidra champagne n’Asturies 1884-1936’ obra de Manuel Crabiffosse Cuesta, y referencia obligada pa estes cuestiones.

‘Princesa d’Asturies’ foi una sidra llargamente espublizada, y que cuntó con importantes niveles d’esportación a tol continente americanu, sobromanera a América llatina, y a Cuba y Arxentina bien especialmente.

Como interés, comentar que pudo caltener el so nome magar que la Casa Rial española blindó a escomienzos de sieglu pasáu l’usu del nome o entítulu de los Príncipes d’Asturies y de les sos fíes.

La marca, que yá nun se comercializa dende va munchos años, foi anovada en 1991 pola casa Vereterra y Cangas.

Ye importante recordar que la donación d’elementos museísticos al depósitu col que cunta la Fundación Asturies XXI nel Muséu del Pueblu d’Asturies garantiza’l so caltenimientu al traviés del tiempu, y lo que ye fundamental, la so puesta a disposición pal estudiu y la consulta pública, contribuyendo asina a la necesaria ellaboración d’un corpus históricu col que conocer y sofitar la industria y la cultura sidrera asturiana al traviés de los tiempos.

 


(Visited 2.464.427 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies