Inicio > Llagares > Pal branu y el calor, ¡Angelón Llimón!
Llagares

Pal branu y el calor, ¡Angelón Llimón!

El nuevu productu del llagar navetu ta ellaboráu con zusmiu cien per cien natural

LA SIDRA.- Ye tiempu de chiringu y bañador, de terraces y pantalón curtiu, d’esfrutar de la gastronomía braniega nesti paraísu natural… ¿Y pa beber? Pos ná meyor que la nuesa sidre, que ye un de los productos más emblemáticos d’esta tierra y que, amás, tolos años los sos ellaboradores esfuerciénse por ameyorar la calidá de la tradicional, pero tamién por anovar con estremaos productos. Y esi fo’l casu del llagar navetu Viuda de Angelón, que sacó al mercáu ‘Angelón Llimón’ una sidre bien enfrescante que tamién se combina con zusmiu llimón —nel so mayor parte— y tamién col de naranxa y llima. Bien rica, bien equilibrada y bien enfrescante.

“Queremos ufiertar un nuevu productu que seya más para’l branu. Yá tenemos sidres d’iviernu, que son les esplumoses, típiques de les Navidaes. Pero buscábemos una sidre que pudiera bebese en cualisquier cafetería, cervecería, terraza o chiringu, en llugares onde davezu nun s’ufierte la sidre natural. Ye un productu que ye bien nuesu y qu’encaxa en cualisquier comerciu, cuantimás nesta dómina, cuando fai enforma calor” desplicó para esta publicación Fran Ordóñez, llagareru de Viuda de Angelón.

Con un par de piedre de xelu nel vasu, Angelón Llimón ye perfecha p’harmonizar con, por exemplu, cualisquier tipu de snack saláu o con tapes de calamares, chipirones, gambes, esguiles… en fin. Pa conocer más a fondu esti productu, un reportaxe especial va salir na prósima edición de la revista LA SIDRA.

(Visited 640.022 times)

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies