Sidre L’Allume recibió na tardi d’ayeri’l Pegollu de los Premios Andrés Solar 2015 en Xixón.

LA SIDRA.- Nel actu rializáu nel CCAI de Xixón pola XDLA n’homenaxe al nacionaliegu asturianu Andrés Solar, referene de les lletres asturianes, el Llagar L’Allume recibió’l Premiu Pegollu en reconocencia al “llabor de Sidre L’Allume, que vien llevando alantre un proyeutu coperativu d’ellaboración y comercialización de sidre usando y visibilizando l’asturianu tantu nel productu comu na so difusión comercial y publicitaria. Por eso son bonos merecedores d’esti premiu.”

Esti premiu Pegollu ye ensin dubia ún de los más dignos que se dan nel nuesu país, anque namás seya pola presona que da nome a estos premios, Andrés Solar,  y nesti casu ye permerecíu dau’l llabor exemplarizante que da esti llagar non solo pola ellaboración del so productu, sinon por facer un usu honráu del conceutu d’asturianu y asturianía, darréu que lo mesmo que mayen namás con mazana del país, tamién fain emplegu normalizáu de la llingua’l país.

El premiu “Madreñazu” foi “pal discursu ranciu y discriminatoriu presente tovía en dalgunes instituciones y medios de comunicación, exemplificao nel casu de Miguel Alarcos”.