Inicio > Sin categoría > Entamu LA SIDRA de Xunetu’23 (Nb. 231)
Sin categoría

Entamu LA SIDRA de Xunetu’23 (Nb. 231)

Entamu

Ye esti un mes particularmente intensu, marcáu bien especialmente pol Salón de la Sidre d’Asturies DOP, eventu que costitúi tou un finxu nel calandariu sidreru y que, añu ente añu, va superándose en tolos aspeutos, dende la cantidá y calidá de la sidre representao, a los aspeutos formales y téunicos propios del Salón.

Al poco tiempu, cuando entá tenemos frescu’l bon saborgu de boca que mos dexa’l Salón de la Sidre d’Asturies, llega’l Festival de la Sidre de Nava, otra triba d’eventu más popular y participativu, y emblemáticu onde los hebia, del que quepe destacar el so espíritu de renovación que permitió que de forma gradual ya incesante fuere alquiriendo nuevos perfiles que lu caltienen de plena actualidá, conxugando los aspeutos llúdicu-populares con otros más formales.

Per otru llau, chigres y merenderos son en sigo mesmos una referencia especialmente obligada en temporada braniega, y anque se sigue abasnando’l problema que supón la falta de formación, entitulación y profesionales del echar sidre, lo cierto ye que se caltien un bon nivel, magar la inoperancia de les alministraciones competentes na so formación y la masificación turística que carecemos nestes feches.

¿Qué dicir de les romeríes y fiestes de prau que s’asoceden estos meses? Que toes elles son una referencia pa los amantes de la sidre, y qu’agora mesmo nun se concibe denguna celebración nel nuesu país que nun tea la sidre d’una o otra miente como protagonista. Y de nuevu destacar los concursos/degustaciones de sidre casero, auténtica delicia que pon de manifiestu la vitalidá de la cultura sidrera asturiana.

A lo cabero, y siguimos coles bones noticies, confírmase l’aniciu de la Rede Europea de Ciudaes de la Sidre, proyeutu que lleva años de desendolcu y que, coincidiendo col XIII Salón Internacional de les Sidres de Gala, va concretase cola firma del protocolu d’adhesión a la mesma. Protocolu nel que s’inclúi la designación de Xixón como see principal y permanente.

Siguimos avanzando.


(Visited 2.498.313 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies