ENTAMU
Avanza la sidre en tinos, pipes, bocóis y toneles anunciando una nueva temporada sidrera na que vamos tener ocasión de comprobar la bondá de les prediciones feches nel momentu de pañar la mazana.
Ye tiempu d’esperances y tamién d’esmoliciones pa los llagareros, los industriales y los caseros, que ven comu acaba de perfilase un productu nel que tienen fiáu muncho más qu’una inversión económica, que ye fonte de vida y prestu, allegría en llagares, sidreríes, romeríes y fiestes de toa triba nes que la sidre inevitablemente ta presente o ye direutamente protagonista.
Y yá el mes que vien va tener llugar el Concursu a la Meyor Primer Sidre l’Añu, l’únicu de tolos esistentes dedicáu espresamente a la sidre recién fecho, ensin trasegar, que precisamente busca potenciar esta sidre tan auténtico y tradicional a la que la escesiva rapidez de la industrialización de los llagares fixo prácticamente esaniciar. La sidre, comu ellementu vivu que ye, hai que dir apreciándola nes distintes fases de forrmientaura/maduración, y conocela dende’l primer momentu resulta imprescindible pa cualisquier amante de la mesma.
Por eso presentamos la Primera Sidre l’Añu, que yá ta na so sesta edición y que tornará a marcar l’entamu de la Temporada Sidrera Asturiana presentándomos la sidre nuevo nun relaxáu ambiente d’espicha tradicional nel que va haber múltiples espresiones de la cultura asturiana de la sidre, con música y tonada asturiana, tasties guiaes, xuegos pa neños, y cómu non, el Concursu de Sidre Caseru fecho en maera, porque la tradición non solo hai que caltenela, hai que da-y puxu.
Por supuestu, el Sidracrucis arrinca motores y yá ta entamándose la procesión asturiana más sidrera de tola Selmana Santa, a la qu’hai que dir a lo menos una vegada na vida.
Per otra parte ende siguen los del “Principado”” enguedeyándola cola so “Llei de Drogues” na qu’implicaron a la sidre, anque agora “indúltenla” pero menos, porque van prohibir beber sidre fasta los 18 años, y los llagares van pasar a ser pocu menos qu’un llaboratoriu de drogues ¿por qué nun mos dexarán en paz? ¿Por qué nun tendremos un gobiernu asturianu que defenda los nuesos intereses y non un “Principado” que mos machuca?
Quedamos ensin pallabres pa definir la so postrer invención, “Sidrerías de calidad”. Encargaron un llogu bien guapu –despreciando a la nuesa llingua de nuevu- pero ensin dengún tipu de conteníu nin reglamentu que desendolque’l conceutu. ¿Esto ye normal?. Asina mos va.
(Visited 2.495.603 times)
