Inicio > Cultura sidrera > Ellaboración tradicional de sidre d’espolleta
Cultura sidreraTasties

Ellaboración tradicional de sidre d’espolleta

La ellaboración tradicional de sidre d’espolleta tien la so complexidá, por mor de la falta de medios cola que se rializaba:

  • Nun había forma controlar la densidá de la sidre corchao –facíase a güeyu, o tolo más amestando una cantidá fixa de zucre per botella una vegada finada la formientaura-, colo qu’el resultáu nun yera controlable, y
    • De ser escesiva la densidá:
      • Podía prevocar un escesu de presión interna y qu’españara corchu o botella.
      • Yera más fácil que quedaren zucres residuales –lo que non siempres se consideraba un defeutu-
    • De ser escaso la densidá
      • Produz menos carbónicu, y ye posible que nun llegue a espolletar en condiciones.
  • Al tratáse d’una formientaura natural –ensin amiestar formientu dalu- esiste una variabilidá importante en función de la resistencia del formientu a les presiones, de tala miente que ye posible qu’al algamar presión dientru la botella conforme avanza la formientación, el formientu muerra ensin ser a acabar col zucre, colo qu’el resultáu final pue ser dulce / semidulce o secu, en función d’ello, y ensin dengún control.
  • Non toles botelles nin tolos corchos aguanten la presión interna del carbónicu xeneráu, siendo mui avezao qu’españe’l corchu o la botella, lo que ye enforma avezao si la densidá al corchar yera escesiva o la calidá de la botella, el corchu o’l corcháu nun ye tolo bona que debiera.
  • La calidá de les botelles / corchos / corcháu / allambráu / grapes… nun yera tolo afayaíza que debiera, y non siempres esistía la disponibilidá de recursos pa ello. De fechu, énte l’ausencia de zucre, en munches ocasiones usábase’l miel p’aumentar la densidá de la sidre a corchar.

 

Les botelles preferíes pa la ellaboración de sidre d’espolleta son les de xampán, que son más gurdies, y que poles carauterístiques del gollete corchen meyor, y pa enriba allámbrase’l corchu, o –ca vegada más- ponse-y una grapa per fuera. Ye tan avezáu esti procedimientu qu’en munches ferreteríes y en cuasique toles tiendes de productos agrícoles del país, hai estes grapes a la venta.

Esti procesu d’ellaboración tradicional de sidre d’espolleta, yera muncho más complicao pa los antiguos, porque al nun poder controlar la densidá de la sidre al corchar, podía dase’l casu d’un escesu de zucre, colo que la presión algamada yera munchu mayor, y les posibilidaes de qu’españare la botella o saltare’l corchu yeren munches.

Aparte, tampoco nun había demasiaes botelles, y la calidá nun siempres yera la más afayaiza pa estes funciones, y lo mesmo pasaba colos corchos y el corcháu.

Precisamente, pa evitar estos problemes, les botelles de sidre d’espolleta entierrábense acabante de corchar –hai quien diz que boca abaxo y otros que n’horizontal- pa qu’aguantaren meyor la presión nel procesu de formientaura… y cuando se descorchaben teníase munchu curiáu de que la botella toviere lo más frío posible y nun ximielgala, porque sinon al abrila españa y sal tol llíquidu de la botella.

 

¿QUÉ YE LA SIDRE D’ESPOLLETA? / ELLABORACIÓN TRADICIONAL DE SIDRE D’ESPOLLETA / ELLABORACIÓN MODERNO DE SIDRE D’ESPOLLETA TRADICIONAL / SIDRE D’ESPOLLETA VERSUS SIDRE AXAMPANAO

(Visited 817.361 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies