Luis Venta, diputáu del PP denuncia que’l sector de la sidre nun tien presencia nos presupuestos del 2024, y urxe l’aniciu d’un plan estratéxicu
LA SIDRA.- El diputáu del Partíu Popular acusa a Barbón de tratar la sidre – y la faba asturiana- como “folclor”. “Namás los quier pa la semeya, pero nun s’esmolez de revitalizar nin sofitar a dengún d’estos dos sectores”
Les declaraciones fueron realizaes en Colunga demientres la cellebración de la selmana de la fabada, y nelles el diputáu del PP responsable del Mediu Rural denunció que nes cuentes autonómiques pal prósimu añu nun apaecen “nin aídes nin compromisu presupuestariu” pa estos sectores, entá ye más cuando “conxelen partíes importantes como la de la promoción d’estos productos”.
Dende’l PP tamién acusen la falta d’interés por desendolcar n’Asturies un plan qu’encete una modernización del sector que, ente otros oxetivos, protexa a los productores de situaciones estremes como la vivida anguaño por cuenta de la seca. “Pa Barbón la sidre y la faba ye folclor, cuando pa munchos asturianos ye’l so mediu de vida. Güei toos ellos siéntense abandonaos pol gobiernu del Principáu”, denuncia.
Plan pal sector
Amás de la falta de compromisu presupuestariu n’ayudes, Luis Venta tamién reclamó un plan específicu qu’aíde a modernizar el sector impulsando concentraciones parcelaries de productores, qu’atraiga a mozos a l’actividá o qu’impulse una tecnificación de les esplotaciones.
Asina mesmo tamién espresó’l so malestar pola falta d’un mayor apueste na promoción de les IXP per parte d’un Gobiernu autonómicu que “destaca pol so inacción” que fai que les marques de calidá asturianes partan “en clara desventaxa respeutu de les d’otres Comunidaes Autónomes”. “La promoción de les marques asturianes escarecen d’una estratexa común lliderada pol Gobiernu, y les partíes del presupuestu pal añu 2024 destinaes a caa marca nun xorrecen nin un solu euru”, denuncia.
