Entamu
Impresiona ver el dinamismu col que sigue l’actividá sidrera en plena seronda asturiana: Xixón de Sidre, Festival de la Mazana de Villaviciosa, sidre casero, sidrocoles, magüestos… y una infinidá d’eventos gastronómico-festivos nos que la sidre sigue trunfando, mentes los llagares tán en plena mayanza, tresnando la que va ser la sidre del 2024.
Esti añu, magar cuntar con que la vecería xugaría al nuesu favor y esperar una collechona de mazana como correspuende a los años impares, lo cierto ye que la producción nun foi la esperada y son munchos los llagares que tuvieron –tán teniendo- dificultaes pa faese con tola mazana asturiana que precisen, recurriendo a la so importanción.
Ye nestos momentos cuando hai que recordar de nueu la necesidá d’un Plan Estratéxicu pa la Sidre y la Mazana qu’apurra soluciones a mediu y llargu plazu a esti problema.
Ye preciso conocer la producción real de mazana, analizar cómo va incidir al mediu plazu la perda de pumaraes tradicionales de resultes de la especulación urbanístico y la masificación turístico, asina como pol despoblamientu rural, la emigración forciada y l’avieyamientu de la población.
Ye preciso calcular la demanda real d’esta mazana, asumiendo que la producción de sidre va menguar de forma inevitable de resultes de la perda del mercáu potencial más dinámicu y de mayor capacidá de consumu -¡un 50% de los asturianos ente 20 y 32 años tán fora del nuesu país!!- , la perda de poder adquisitivu y la aculturización galopante.
Y en función d’esos parámetros realizar una planificación correcha, pública, tresparente, evaluable y dotada del sofitu económicu necesariu. Con esa voluntá política, a curtiu o mediu plazu -¿unos 10 años?- podríemos consiguir daqué tan cenciello como autoabastecese y zarrar el ciclu económicu na nuesa redolada, fortaleciendo una economía circular identitaria que, de xuru, repercutiría de forma positivo na dinámica económica asturiana.
Da un poco vergoña plantegar semeyantes obviedaes, pero esta situación lleva decenios repitiéndose y paez que naide nun quier asumir nin el problema, nin la evidente solución al mesmu.
En tou casu, lo cierto ye qu’adulces, toneles y depósitos siguen enllenándose y que’l ciclu de la sidre sigue imparable, y con elli anovamos los nuesos deseos y esperances en que la sidre que vamos esfrutar el prósimu añu va ser, ensin dulda, inmeyorable.
Pa recibir el PDF fai falta tar dáu/da d’alta nel whatsapp de LA SIDRA
