Inicio > Opinión > Entamu LA SIDRA 181 (Xineru’19)
Opinión

Entamu LA SIDRA 181 (Xineru’19)

Entamu

Escomienza l’añu col bon saborgu de boca d’unes fiestes navidiegues nes que la sidre ameyoró’l so allugamientu nes meses asturianes, non solo la sidre natural, cuya calidá en ná desmerez frente a los vinos, sinón tamién y principalmente no qu’a les Sidres de Gala se refier, y bien especialmente a les sidres brut, cuyu consumu aumentó neses feches de forma bien significativo; atalantamos que, ente otres cuestiones, pol llabor desendolcáu nestos años pol Salón Internacional de les Sidres de Gala, les campañes de Asturies Sidre Brut entamaes pola DOP Sidre d’Asturies, y per medios de comunicación como’l nuesu qu’aidaron y aíden a dar a conocer estos nuevos productos y a reivindicalos pola so estraordinaria calidá.

N’otru planu, y n’otros términos, paez confirmase que’l “Principado” tampoco nun va presentar esti añu la candidatura de la Cultura Sidrera Asturiana pa la so declaración como Padremuñu Inmaterial de la Humanidá pola Unesco. Una vegada más incumpliéronse les promeses realizaes pol mentáu ente autonómicu y tou va quedar rellegao a propaganda nos medios de comunicación, y actos simbólicos ensin mayor trescendencia práctico.

Hai de remembrar equí qu’otres candidatures asemeyaes, anunciaes al mesmu tiempu que la de la nuesa cultura sidrera, como ye’l casu de les falles valencianes, yá algamaron va un añu dicha reconocencia pola Unesco, mentes el “Principado” nin siquier llegó a presentala énte’l gobiernu español pa qu’ésti l’almita, la ponga a la cola de les yá esistentes y ¡a saber cuándo! la remita a la Unesco. Y ye que cuando la incapacidá amiéstase al desenfotu los resultaos nun puen ser otros.

Nel aspeutu positivu, y bien de remarcar, son los resultaos de la última encuesta rializada pel Cientru d’Investigaciones Sociolóxiques –CIS-, organismu dependiente del Ministeriu de la Presidencia español, nos queAsturies apaez espeyáu, con diferencia, como la comunidá con mayor auto-reconocencia identitario del Estáu, lo que supon toa una garantía de futuru pa la nuesa sidre, tan xuncía a la identidá asturiana.

(Visited 2.467.047 times)
Compartir

One thought on “Entamu LA SIDRA 181 (Xineru’19)

Comments are closed.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies