Tendrá llugar na Casa Cultura de Mieres del Camín el xueves 10 de xineru a les 19:00 hores
LA SIDRA.- La programación cultural del añu 2019 del Ayuntamientu Mieres llega apinada d’actividaes ya inclúi cites novedoses y fondamente xuncíes a los raigaños y a la hestoria del conceyu. Ye’l casu del ciclu conferencies “Saborgos de Mieres” una iniciativa que ñaz col oxetivu de poner en valor y dar puxu al ricu y variáu padremuñu gastronómicu del conceyu, permitiendo un averamientu a la hestoria gastronómica de Mieres y solliñar la importancia y la contribuición de la cocina tradicional al mundiu culinariu. Poner en valir los recursos esistentes en Mieres nel ámbetu gastronómicu, destacar el papel de les muyeres guisanderes na cocina en xeneral y dar puxu a una posible fonte económica de diversificación pal conceyu empobinada al seutor servicios son dellos de los oxetivos d’esta propuesta, qu’entama esti xueves 10 de xineru con Marcos Cienfuegos, cocineru y autor del trabayu sobro la Cocina de Mieres, qu’ufrirá una conferencia entitulada “La Cocina de mieres como contribución a la Gastronomía Asturiana”
Sedrá na Casa Cultura, de magar les 19 hores. Una cita ineludible na que Cienfuegos dará a conocer parte del so trabayu d’investigación y recuperanza de la Cocina de Mieres, faciendo un percorríu y remembrando los sos principales platos y recetes y l’aniciu de los mesmos, ensin escaecer a los sos protagonistes, ello ye, les sos famoses guisanderes y mongongueres. L’impautu de la nuesa cocina, tantu nel saber como nel facer, na cocina asturiana tamién sedrá otru de los temes d’esta conferencia, na que tamién se pondrá de rellevancia un fechu, de va 40 años, que permitió que la sociedá mierense, al traviés de la Xunta d’Iniciatives y Promoción de Mieres, del Cientru Cultural Mierense y d’un grupu hosteleros, gastrónomos y guisanderes de la dómina, escoyera determinaos platos como embaxaores de la cocina llocal. La cita con Marcos Cienfuegos y el so saber sobro la Cocina de Mieres sedrá, per ende, el xueves 10 de xineru a les 19 hores na Casa Cultura ya inclúi tamién una degustación gratuita de platos típicos de Mieres. Tres esta conferencia, “Saborgos de Mieres” continuará con otres dos cites, los díis 27 febreru y 13 marzu, nes que s’abordará’l Pasáu y Presente de la Cocina d’Asturies, retos de futuru y El Gastroturismu como oportunidá de desendolcu de la economía llocal. Amás ta prevista la edición d’una guía con aquellos platos y recetes representatives de Mieres que fueron esbillaes nel so intre pola sociedá del conceyu. Escomienza’l xueves, por tanto, un percorríu pel mundiu de la gastronomía como tradición, hestoria, presente y futuru.
Amás, hai de destacar que Mieres del Camín ye una villa sidrera con referentes tan importantes como’l llagar Panizales o la mui sidrera Plaza Requezu, de fechu l’Ayuntamientu Mieres declaró la sidre como bébora istituiconal y foi ún de los primeros conceyos en sofitar públicamente la candidatura de la cultura asturiana de la sidre como Padremuñu Cultural Inmaterial de la Humanidá pola UNESCO. Remembramo que la revista LA SIDRA nº 180 podréis alcontrar un artículu sobro la “ruta chigrera” de Mieres.
(Visited 2.511.301 times)
