Inicio > Sin categoría > X Asturianada y Sidre
Sin categoría

X Asturianada y Sidre

PSLA 2019 sábado

La de la Primer Sidre l’Añu foi dende l’aniciu un apueste pola cultura asturiana nel sen más ampliu, poro dende la so primer edición túvose bien nidio la necesidá de resaltar el venceyu pente la asturianada y la sidre, pa lo que s’entamó esta amuesa añal que presenta dalgunes de les meyores promeses de voces del país.

Esti añu participaron nella escolinos y profesores de cuatro escueles d’asturianada.

Cuando, va diez años, s’entamare cola amuesa d’Asturianada y Sidre, de la man de Xosé María Fernández “Llábana”, pocos camentaron que munchos d’aquellos rapacinos y rapacines que entamaben a actuar en públicu finaríen por ser vraeros referentes de la música asturiana , y que los cantares qu’interpretaron nel eventu sedríen, a la llarga, popularizaos por ellos mesmos.

Préstanos pensar que’l fechu d’ufri-yos el so primer escenariu tuvo daqué que ver nello y que ye precisamente la so popularidá la qu’engabita’l xorrecimientu del interés pola tonada ente los más mozos.

La Primer Sidre L’Añu caltién el so compromisu cola música’l país y cola reciella que quier continuar cola tradición, ensin dexar que decaiga esta parte de la cultura asturiana, la músical, que siempres caltuvo una perimportante relación col mundiu de la sidre.

De la qu’entamó esti certame, el fechu de dexar espaciu a voces nueves yera una de les principales diferencies pente Asturianada y Sidre ya’l restu de certámenes; agora que la mocedá va faciéndose camín y yá hai más escenarios abiertos pa ellos, queremos recalcar la otra carauterística diferenciadora: l’ausencia de competitividá.

Na Primer Sidre l’Añu l’Asturianada siéntese ensin competición nin concursu, namás, cenciellamente pol gustu de sentir la nuesa canción más emblemática mientres esfrutamos de la sidre.

Tamién ye específico de l’Asturianada y sidre el valorar perespecialmente que los cancios escoyios tean una lletra que mencione la mazana o la sidre y que se cancien n’asturianu.

Esti añu, el Tendayu tornó a ser l’escenariu perfechu pa los escolinos de La Escuela de Música Tradicional La Quintana, de Xixón, y la Escuela de Música de Grau, que vinieron acompangaos pol so profesor, Ismael Tomás, pa los de la Escuela de Música Manolo Quirós, d’Uviéu, de la que ye profesora Anabel Santiago y pal únicu participante, Luis Álvarez, qu’acompangó a Lorena Corripio dende Colunga, cola Escuela de Música La Cueva.

Ismael Tomás, profesor de la Quintana y de la Escuela de Música de Grau, vieno acompangáu de cuatro de los sos escolinos más mozos, Manuel Valle, Vanesa Señas, Noemí Alonso y Natalia Fernández, toos ellos d’ente 10 y 17 años.

Tomás declarose entusiasmáu pola posibilidá que pa los neños y pa elli representa el poder actuar nesti marcu, pero llamentó que nun se abra esa posibilidá a los sos escolinos de mayor edá “pente ellos tamién hai voces perbones y tamién son alumnos mios” comentó, dexando abierta la posibilidá d’ampliar el Certame d’Asturianada y Sidre pa dar cabida a toles edaes.

Tolos profesores resaltaron el puxu que l’asturianada ta teniendo pente la reciella y la mocedá, daqué que garantiza’l relevu xeneracional a curtiu plazu, cuestión que va unes décades nun paecía tan claro.
La mesma Anabel, con cinco discos editaos, ye un exemplu d’esti relevu, non solo pola so mocedá, sinon pola anovación musical qu’inclui nos sos temes más nuevos.
A esti certame vieno acompangada de trés de los sos cantantes: el xovencísimu Néstor Díaz, que con namás un añu na escuela de música yá dexa a toos ablucaos cola potencia de la so voz, Beatriz Vilas, que depués de tres años participando yá tenía los sos fans aclamándola nel Tendayu y Alicia Villanueva, cuasi una veterana ya pesi a la so mocedá, a la que se-y noten los diez años dedicaos al estudiu y prautica de la tonada nel perfechu control de la so voz.

Pa Isabel Santiago, el panorama de la música no que cinca a la canción asturiana ta nun momentu únicu, ya qu’hai una cantera de moces y mozos con edaes ente 6 y 18 años con ganes de deprender, ilusionaos poles tradiciones, que tan convirtiéndose nel relevu xeneracional tan necesariu nesti xéneru.

El so espardimientu, pa ella, pasa pola difusión nos medios de comunicación y un circuitu musical onde puedan cantar y dase a conocer y el sofitu a les escueles de música tradicional que sofiten la ensiñanza de la tonada asturiana.

Ye de destacar la entrega del públicu presente, que recibió a los cantantes con grandes muestres d’emoción, aplaudiendo a rabiar y ovacionando les actuaciones entusiasmáu.

La décima edición del festival Asturianada y Sidre presllóse con una sentía interpretación del Himnu Asturies Patria Querida por parte de los escolinos de la Escuela de Música Manolo Quirós, Néstor Díaz, Alicia Villanueva, y Beatriz Vilas, acompangaos pola so profesora y coreaos pol tol públicu presente na Primer Sidre L’Añu.

(Visited 726.798 times)

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies