La Universidá de Vigo entámalu n’A Estrada y va centrase nel potencial turísticu de la bébora.
LA SIDRA.- Ayeri escomenzó n’A Estrada un cursu sobro’l potencial turísticu de la sidre, esti taller enmárcase dientru del Máster Universitariu en Direición y Planificación del Turismu d’Interior y Salú. Sicasí, cualisquier presona interesada pue participar, yá seyan universitarios, hosteleros, empresarios o vecinos de la llocalidá. Güei y mañana pela tardi, el profesor de la Universidá d’Uviéu, Francisco Javier de la Ballina, ún de los promotores de la puesta en valor de la sidre como recursu turísticu, va ufiertar una charra na qu’espondrá les sos conocencies sobro’l sidreturismu. Tamién va tener llugar una mesa reonda sobro’l potencial d’A Estrada con respeutu a la bébora.
De la Ballina foi Director Xeneral de Comerciu y Turismu del “Principado”, siendo responsable de les lleis de turismu y comerciu interior, cordinaor del programa Ruta Vía de La Sablera y España Verde, y participó na puesta en marcha de les Marques de Calidá Mesa d’Asturies y Aldegues d’Asturies.
La iscripción pal cursu de sidre n’A Estrada tuvo un costu de 50 euros pal públicu xeneral y de 32 pa los estudiantes universitarios. Incluyía agospiamientu, desplazamientu y comíes. A esti respeutu, n’Asturies cellebrárense en xunu les I Xornaes de Sidreturismo. El Conseyu Regulador de la DOP Sidre d’Asturies collaboró activamente en dichu alcuentru. “Un apueste decidíu por que la sidre, los llagares, les pumaraes y la so redolada pasen a formar parte d’esperiencies turístiques y de conocencia dende l’orixe al consumidor final” siñaló l’organismu. La matrícula costó 220 euros lo que suscitó entueyos pa que la mocedá interesao arrenunciare participar.
