Inicio > Chigres > Yumay, confradere d’honor del Quesu Gamonéu
ChigresGastronomía

Yumay, confradere d’honor del Quesu Gamonéu

La hermandá gastronómica va cellebrar el so Gran Capítulu’l 8 d’ochobre nel que la sidrería avilesina recibirá esta  reconocencia.

LA SIDRA.- La sidrería Yumay, del barriu avilesín de Villalegre, foi nomada confradere d’honor per parte de la Confradería del Quesu Gamonéu. “Esta reconocencia ye pol so esquisitu cuidu y escelente promoción demientres años d’esti quesu” siñalaron dende la citada hermandá gastronómica. El so Gran Capítulu va cellebrase’l prósimu 8 d’ochobre y va ser ende onde s’apurra oficialmente la reconocencia a Lola Sánchez y Justo García, propietarios del Yumay y al mandu de l’asociación: Los Gastrónomos del Yumay, primer hermandá culinaria forxada d’una sidrería.

La sidrería Yumay trabaya de cutio pa da-y puxu y desencolcar la gastronomía asturiana. Exemplu d’ello son les costantes xornaes que fain demientres tol añu, y cites tan importantes como’l Xamón de Plata Negro Grande Covián 2017’. El pasáu’l 24 de xunetu esti gallardón  foi apurríu al rector de la Universidá d’Uviéu; y n’años anteriores a presonalidaes como Gloria Grande Mingo, fía del pernomáu médicu ya investigador asturianu y presidenta de la citada fundación; Rafael Ansón, presidente de la Real Academia de Gastronomía; Gregorio Varela, caderalgu y presidente de la Fundación Española de la Nutrición; María Neira, directora de Salú y Mediu Ambiente de la OMS; y al tamién caderalgu y científicu Miguel Pocoví.

Per otru llau, el Quesu Gamonéu ye una de les variedaes queseres del nuesu país más conocíes y antigües. Ca pieza de quesu, nes sos dos variedaes: la del Valle y la del Puertu, ye “un cachu de Asturies y los sos collores. La lleche da-y el blancu de los cumes nevaos de los Picos d’Europa, el llar del Gamonéu. La maduración nes cueves siguiendo un procesu ancestral de preparación de ca pieza, apurre al quesu tonos azulaos, acollorataos y verdosos, cielu y monte d’Asturies afiguraos na corteyaa y l’alma d’esti manxar” despliquen dende la DOP.

(Visited 2.466.564 times)
Compartir

Dexa una rempuesta

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies