Inicio > Eventos > Güei entama’l Salón Internacional de les Sidres de Gala
EventosEventsSISGA

Güei entama’l Salón Internacional de les Sidres de Gala

Los amantes de la sidre de tol mundiu tienen los güeyos puestos en Xixón, onde güei entama’l Salón Internacional de les Sidres de Gala; non en baldre esti ye un eventu internacionalmente reconocíu nel que se dan alcuentru les meyores sidres del globu

Llagareros de 21 países tan en  Xixón, la so sidre reposa ya enfriando pa que te en so puntu cuando, a les doce’l mediudíi, entamen los actos d’esti doceavu SISGA nel Hotel Rey Pelayo, onde tendrá llugar la inaguración, acompangada d’una perinteresante tastia de sidre escocesa.

Darréu, les actividaes sedrán continues fasta la mañana del domingu, entamando por una tastia guiada de sidre letona (Mr. Plume) y asturiana (Riestra), que tendrá llugar la mesma tardi del xueves na Escuela d’Hostelería y Turismu de Xixón, entidá collaboradora del Salón.

Tres de les tasties, LA SIDRA llevará mañana a los llagareros a conocer un llagar asturianu, en concreto’l de JR, onde amás de conocer el sistema asturianu d’ellaboración de sidre recibirán una clas maxistral d’echar sidre a cargu de Loreto García, de la Sidrería el Madreñeru. Con ello trátase d’averar al públicu internacional la cultura asturiana de la sidre, un de los finxos principales d’esti eventu. 

Esti añu cuntamos cola participación de na menos que 73 llagares de 21 procedencies perestremaes, la mayor asistencia de la hestoria del SISGA, incluso pesi a les torgues a les que tien d’enfrentase la participación internacional por mor del aisllamientu por tierra, mar y aire al que ta sometía Asturies, comu destacó Marcos Abel Fernández, presidente de la Fundación Asturies XXI, na presentación del Salón que tuvo llugar esti llunes na Casa Conceyu de Xixón.

Marcos Abel recalcó tamién la emportancia del SISGA a la hora de francer  la desconocencia a nivel internacional de Xixón, Asturies y la so sidre. Na presentación de los actos participaron tamién Manuel Vallina, Conceyal de Cultura del Ayuntamientu Xixón, Manuel G. Busto, Presidente del Xuráu Internacional de los Premios SISGA y Mª José Fernández, Direutora del CIFP Hostelería y Turismu de Xixón, que declaró que “Si se fala d’Asturies, fálase de sidre”, aporfiando nel papel de la cultura sidrera pa visibilizar internacionalmente’l nuesu país.

 

A lo llargo tol fin de selmana cellebraránse tasties guiaes, charres, talleres de cocina y coctelería sidrera, pero ensin dulda son dos los eventos que cientren l’atención de los participantes del Salón Internacional de les Sidres de Gala; per un lláu los premios SISGA, que’l Xuráu Internacional decidirá na mañana del vienres y que tienen a los llagareros n’ascues y pel otru, lo más esperao pol públicu xeneral, la Tastia Abierta al Públicu, na que por namás diez euros los asistentes podrán degustar llibremente toles sidres participantes nel eventu, vinientes de 73 llagares de 21 países estremaos  Pa conocer tol programa y les sidres que participen, recomendamos visitar la páxina del SISGA.

 

 

(Visited 2.464.734 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies