Inicio > Encamientos > Sidrería L’Astilleru, n’El Natahoyo
EncamientosEncamientos

Sidrería L’Astilleru, n’El Natahoyo

Asitiá nel Barriu’l Natahoyu de Xixón, la Sidrería L’Astilleru ta rexentada por Olga Milena Cardona, colombiana d’orixe y asturiana d’adopción, que foi quien a caltriar dafechu’l calter y furrulamientu de la sidre y los chigres asturianos, seique l’andanciu camudó la so avezada imaxe de barra atarraquitá de pinchos pa los veceros por pinchinos individuales, igualmente xenerosos.

Na so carta –agora por códigu QR- alcontramos propuestes variaes, dende platos tex mex a la cocina más asturiana. Preparen una fabada de campionatu, que compite en tastu y contundencia col so cabritu con patatinos, pente munches otres opciones, tando los chipirones encebollaos pente les más demandaes, xunto coles sos variedaes de cachopu. Pa la reciella, les patates astilleru con carne y quesu son la estrella indiscutible. Munchos d’estos platos inclúinse nos sos menús –selmanal a 9 € y dominical a 12-, destacables por cantidá, calidá y variedá.

Malque la so propuesta gastronómica se cientra na cocina asturiana, tamién puen tastiase platos colombianos, eso sí, por encargu. Merez la pena prebar la so “Bandeja Paisa”, el platu más representativu de la cocina antioqueña, con fabes pintes, arroz blanco, carne molío, panceta, güevu fritu, criollu y arepa.
Si queremos sidre, tenemos pa escoyer pente Viuda de Angelón, Prau Monga DOP, Trabanco y Trabanco Sobro la Madre.

L’Astilleru, sidrería. Los Laboratorios 27. El Natahoyo, Xixón. T. 985 16 44 09

 

(Visited 2.465.220 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies