Inicio > AS > Eventos > Sidre y amplia ufierta cultural na VII PSLA
Eventos

Sidre y amplia ufierta cultural na VII PSLA

Por 5 euros, los asistentes a la Primer Sidre L’Añu van poder prebar la sidre de más de 70 llagares, incluyendo la dulce y ensin alcol; tamién van poder esfrutar y participar d’actividaes comu esportes tradicionales, música, baille, artesanía, cocina en direutu o xuegos pa neños.

LA SIDRA.- El martes 22 de marzu tuvo llugar en La Casa de la Palmera en Xixón la presentación de la VII edición de la Primera Sidre L’Añu –PSLA– na que se desplicáronse refechamente les actividaes culturales, esportives y gastronómiques que van tener llugar los díis 24, 25, 26 y 27 de marzu nel Muséu del Pueblu d’Asturies en Xixón.

 

Na presentación intervinieron Laura Uría en representación de la Fundación Asturies XXI y de la revista LA SIDRA; Xosé Mª García “Llábana”, direutor de l’Amuesa Asturianada y Sidre; Falo Caldones, responsable de les actividaes d’artesanía, mayada y animación infantil; y Alfonso Prado, del llagar La Morena. Nel actu tamién participó Jorge González-Palacios, xerente de Divertia.

Al empiezu de la presentación, Laura Uría, en representación de los organismos enantes mentaos, manifestó’l so pesar polos atentaos acaecíos esi memu díi en Bruxeles. Darréu siñaló les actividaes que se van llevar a cabu demientres los cuatro xornaes de la PSLA n’horariu de 12:00 a 22 hores, sacante’l domingu, una y bones l’eventu va clausurar a les 17:00 hores.

“Cola Primer Sidre L’Añu empecípiase la temporada sidrera asturiana. Nesti recupérase la tradición de les espiches de Selmana Santa y del consumu de la sidre nuevo y ensin trasegar. Esti tipu de sidre tuvo a puntu d’esaniciase por mmor de la industrialización de los llagares y la xeneralización del trasiegu. Por ello buscamos da-y el llugar que se merez y recuperar pal eventu” dixo Uría y darréu felicitó al llagar La Morena, vencedora de La Meyor Primer Sidre L’Añu 2016, qu’al ganar dichu concursu, convirtióse na sidre oficial de la PSLA.

El xueves 24 de marzu a les 13:00 hores va tener llugar la naguración de La Primer Sidre L’Añu al cargu de los trabayaores de Gijón Fabril. Tamién se va cuntar cola presencia del conceyal de Turismu Jesús Martínez Salvador, el yá citáu propietariu del llagar La Morena, y miembros de les distintes confraderíes gastronómiques asturianes. El campión echaor de sidre 2015, Jorge Vargas, va ser quien eche’l culín nagural.

La entrada a la PSLA va costar 5 euros. Por esi preciu, los asistentes van poder prebar la sidre nuevo de más de 70 llagares. Tamién se va cuntar con una importante representación de les sidres gallardonaes nel Salón Internacional de les Sidres de Gala 2015 —SISGA’15—; lo mesmo que d’una interesante esbilla de sidres internacionales. Por supuestu nun va faltar sidre dulce y ensin alcol, pa que tol públicu pueda esfrutar de la nuesa bébora por escelencia.

Comu n’años anteriores tamién se va llevar a cabu l’Amuesa d’Asturianada, el concursu de sidre casero fecho en maera; cocina en vivu y armonizaxe con sidre; música y bailles del país; amuesa d’artesanía asturiano en direutu; esportes tradicionales; esibiciones y clases d’echáu, ente munches más propuestes.

“Asturianada y sidre siempres tuvieron xuntos… dende los oríxenes. Nos chigres, nos llagares, siempres se bebía sidre y cantábase. Polu tantu nun puen faltar dambos elementos na Primer Sidre L’Añu. Amás equí apostamos pola xente mozo, apostamos poles nueves voces asturianes, polos nuevos valores” afirmó Llábana y numberó les escueles que van participar el vienres y el sábadu a les 17:00 hores na amuesa de tonada: Escuela de Música Tradicional Manolo Quirós  al cargu d’Anabel Santiago, Escuela de Música Tradicional La Quintana col profesor Ismael Tomás; y Escuela Casa La Cultra de Colunga al cargu de Luis Castiellu. “Van cantar toos ellos, tienen ente 12 y 15 años, y los mayestros tamién van cantar” dixo.

Amás de l’amuesa de tonada, anguaño los más pequenos van tener más actividaes pa divertise. Por exempluu, ellos mesmos van poder mayar mazana pa que puedan esperimentar de primera man ún de los pasos esenciales pa la ellaboración de sidre. Tamién van poder asistir a un taller de decoración de galletes, corchar sidre a mazu, participar en xuegos comu la xaronca, la llave o’l tiru de boína; o concursar nun certame de echaores.

“Los xuegos tán perdiéndose por culpa les máquines. Entós vamos enseñar un pocu too aquello: los bolos, la xaronca, la llave o’l tiru boína. Inclusive les artesaníes tán escaeciéndose por desgracia. Na PSLA vamos recuperar too ello, y que los neños y mayores lo pasen bien. Y tamién recordar lo que yera una folixa d’enantes, la que se facía nuna casa, onde se festexaba corchando sidre y los neños taben perí xugando” rellató pela so parte Falo Caldones.

Alfonso Prado destacó que con elli son cinco les xeneraciones faciendo sidre nel llagar La Morena. “Estos postreros años llevamos una llínea ascendente y algamemos dellos premios. Yo creo que too gracies a la dedicación, al llabor en familia. Entá ellaboramos la sidre col sistema tradicional y sobromanera col ciñu del trabayu que se fai díi ente díi. Espero qu’esta sidre vos preste y dea la talla na espicha” indicó’l llagarero.

Na presentación, Laura Uría estimó la collaboración de Divertia Xixón y del Muséu del Pueblu d’Asturies. Ende, como parte de la ufierta cultural, van entamase visites guiaes.

Más información y consulta del programa completu na páxina ueb: www.lasidra.as. Y nes redes sociales: https://www.facebook.com/lasidrainfo, revistalasidra en Twitter, y revistalasidra n’Instagram.

(Visited 2.468.064 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies