El llagar de Nava repite comu campión y Sidre Arbesú queda en segundu llugar, a namás un puntu de distancia, depués d’una final reñía enforma pente los siete finalistes
LA SIDRA.-. Ayeri tuvo llugar na Sidrería La Montera Picona la fase final del Concursu de la Meyor Primer Sidre l’Añu. A ella concurrien les siete sidres finalistes escoyíes en tastia ciega na primer fase’l concursu, cellebrao’l pasáu 31 de marzu, siendo estes les de los llagares: Acebal (Xixón), Arbesú (Siero), El Duque (Xixón), Germán (Avilés), Fonciello (Siero), Orizón (Nava) y Roza.
Na final, que se rializó en dos vueltes, el públicu -pente’l que s’atopaben tolos llagareros finalistes- pudo ver a qué llagares pertenecía la sidre que se puntuaba en ca momentu, nun panel a espaldes del xuráu, lo qu’aumentó la emoción, sobre tou porque na primer ronda les puntuaciones andaben mui igualaes. Les deliberaciones del xuráu, presidíu por Manuel G. Bustu y compuestu amás por Armando Loredo, Joaquin Fernández y Donato Joaquin villoria, fueron intenses, cuidao que les puntuaciones fueron bien averaes y namás na segunda ronda definióse Sidra Roza comu ganadora, quedando Sidra Arbesú de segundes, a namás un puntu de ventaya y Sidra Orizón en tercer llugar.
Finalmente, Sidra Roza fue la que mayor puntuación sumó pente les dos rondes. El premiu entregaráse a Juan Roza esta mañana, na inaguración de la Primer Sidre l’Añu, darréu el pregón qu’esti añu cuerre a cargu de Vicente Díaz.
El premiu supón la merca de 1.000 € en sidre, y el ser la sidre oficial de la Primer Sidre L’Añu -PSLA-, onde podrá degustase la sidre non solo de Roza –que sedrá la oficial- sinon tamién de les finalistes y d’alrodiu d’otres 40 sidres que tarán a dimposición de los participantes d’esta PSLA, l’entamu de la Temporada Sidrera Asturiana.
