Inicio > Cultura sidrera > Segunda Xornada sobro estratexes escontra la vecería
Cultura sidrera

Segunda Xornada sobro estratexes escontra la vecería

La formación foi impartida por Jean Charres Cardon, espertu en mazana de sidre de Normandía y Enrique Dapena, del SERIDA, quien anunció que, posiblemente, pal 2021 puedan ufiertase a los pumareros nueves races de produición regular que “yá tán llantaes”

LA SIDRE.- El Grupu Operativu de Mazana de Sidre, nel que ta incluyíu’l SERIDA, entamó güei la segunda de les xornaes de Formación sobro Estratexes pa Regularizar la Produición dean Mazana de Sidre. La primer parte tuvo llugar el pasáu 12 de xunu. El llugar escoyíu pa llevar a cabu ambos alcuentros foi nel IES Víctor García de la Concha en Villaviciosa.

Esta sesión dedicóse a afondar nel orixe biolóxicu de l’alternanza, l’aclaréu químicu, y les alternatives al mesmu. La formación del díi de güei foi impartida por Jean Charres Cardon, espertu en mazana de sidre de Normandía y miembru de la Cámara Agraria d’esa rexón.

Elli desplicó les distintes estratexes que s’utilizaron nel so país pal aclaréu de los pumares; y tamién, les sos posibles alternatives na produición ecolóxica como’l polisulfuru de calciu, el Prev B2 o l’aceite de colza.

Per otru llau, la primer sesión, la del 12 de xunu, tuvo dedicada a la conduición d’árbol y regulación de la carga granible; o les nueves races de produición regular del Programa de Meyora del SERIDA.

Sobro esti asuntu, Enrique Dapena, responsable del programa de fruticultura del SERIDA, indicó a esta revista güei qu’eses nueves variedaes son la resultancia d’años d’investigación nes que se llevaron a cabo llínies de cruzamientos de mazanes descendentes de races como Raxao, Pericu, Colloradona, por mentar dalgunes, que tienen mecanismos de autoaclaréu y de fructificación regular. “Esti añu llantáronse yá en dos esquiñones de productores, y esperamos qu’en 2021, 2022 yá empiecen a tar disponibles pal conxuntu de productores” dixo Dapena.

La xornada tuvo promovida pol Grupu Operativu de Mazana de sidre integrái por Campoastur, la DOP Sidre d’Asturies, Dexnera, Finca El Gallinal, Grupo El Gaitero, Sidra Muñiz, Agrecoastura, SERESCO, Sidre Trabanco, SERIDA y INDUROT.

(Visited 686.538 times)

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies