Inicio > AS > Tasties > Salvador Ondó campión echaor
Tasties

Salvador Ondó campión echaor

El conocíu como “Caballeru Escuru” gana la competición oficial d’Asturies

LA SIDRE.- La sospresa nun tenía cabida nel postrer Campionatu Oficial d’Echaores d’Asturies. Salvador Ondó cuntaba con toles papeletes pa llevar el primer premiu. La gran trayeutoria que se forxó demientres los 16 certames entamaos per tol nuesu país perfiláralu como vencedor indiscutible. Que xugara en casa nun-y dio denguna ventaxa –yá qu’Ondó trabaya n’El Otru Mallu–. Ello ye que al rematar Jeison Franco de la sidrería El Madreñeru la so ronda d’echáu –Franco foi’l que siguió a Ondó nel concursu quedando en segundu llugar–, Ondó ocupaba yá’l primer puestu del podiu, inclusive, ensin nin siquier tener qu’echar. El tercer puestu de la clasificación xeneral ocúpalu’l campión del añu pasáu Jorge Vargas.

 

La final del Campionatu Oficial d’Echaores tuvo llugar el pasáu a cabu’l xueves 24 payares n’El Otru Mallu. 19 participantes d’estremaos puntos d’Asturies participaron nesta. Hebio tres categoríes: xeneral, llocal y xuvenil. El campión de la llocal foi Junior de la Sidrería El Sabugo y de la xuvenil, la pequeña Alexandra Castellanos. “Esti premiu dedícolu a los mios compañeros de trabayu y tamién al mio xefe, que sofita estos concursos” dixo Salvador Ondó.

Asina, por esti añu présllase ún un de los campionatos más importantes pal fomentu de la cultura sidrera asturiana. Sicasí, ca añu faise más complicáu llevalo a cabu. Magar hai entidaes que patrocinen esti alcuentru como la Sidre DOP de Asturies, la Caxa Rural, la Conseyería de Desencolcu Rural o sidreríes como ‘Los Mallu’; fai falta más inversión y,  cuantimás, una mayor implicación de tolos seutores que componen el mundiu de la sidre. La implicación ye importante y como bien se diz “Si nun lluchamos polo nueso ¿Quién lo va a faer?”

(Visited 2.465.093 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies