Inicio > Cultura sidrera > Piloña retoma’l so concursu de sidre casero
Cultura sidreraTasties

Piloña retoma’l so concursu de sidre casero

Con Ribeseya como conceyu invitáu, les novedaes d’esta sesta edición son una parrillada y un concursu d’echáu popular

LA SIDRA.- Piloña tornará cellebrar el primer domingu de setiembre, dempués de trés años de parón, el so certame de la sidre casero. Ribeseya ye’l conceyu convidáu d’esta sesta edición, na que va haber novedaes como una parrillada y un concursu d’echáu popular.

La gran folixa sidrera de Piloña va tener llugar el domingu 4 setiembre na plaza del Ganáu de L’Infiestu, de magar les once la mañana. Va empecipiar a les 11 hores con un pasacais animáu con un carru vaques, música’l país, repartu sidre y la participación d’una dellegación de Ribeseya, que ye’l conceyu invitáu. La cantante Mina Longo va nagurar la fiesta cola llectura del pregón y, de siguío, fadráse la final del VI Concursu de Sidre Casero de Piloña ente les doce meyores sidres escoyíes el sábadu. “Tamos bien satisfechos porque esti añu inscribiéronse bastantes llagareros nuevos y eso ye bien positivo, yá que sinifica que se caltien la tradición, que’l llabor de l’asociación ta dando los sos frutos y qu’esta fiesta motiva a los ellaboradores”, destaca Luis Sariego, presidente de l’Asociación de Sidre Casero de Piloña, colleutivu qu’entama’l certame col sofitu del Conceyu, Caxa Rural y collaboradores. “Ye’l díi d’alcuentru de los llagareros y d’axuntase na capital del conceyu ente culetes de sidre”, repostia.

Mientres se disputa la final, los asistentes van poder probar les bébores participantes, que van ufiertase nos distintos puestos allugaos na plaza’l Ganáu. Namás fai falta mercar el vasu comemorativu del certame al preciu de cuatro euros. El públicu tamién va dar el so veredictu sobro les sidres participantes escoyendo col so votu popular la meyor. Una de les novedaes d’esti añu ye la parrilla de costielles, pitu, chorizu criollu y arroz con llechi que podrá tastiase por 20 euros.

Les semifinales van desendolcase de magar les 17 hores del sábadu, na plaza’l Ganaú de L’Infiestu. Al empar tamién va disputase’l ‘I Concursu d’Echáu Popular’, nel que’l vencedor llevará un premiu dotáu con cien euros, otorgáu pola Cafetería Denver.

Los llagareros caseros del conceyu Piloña que deseyen competir nel VI Concursu de Sidre Casero tienen de plazu fasta’l llunes p’apurrir les dos caxes con botelles de sidre tradicional asturiano que se requier pal certame y pa la degustación. Ca caxa tendrá de tar identificada col nome, el teléfonu de contautu y la llocalidá. Pue participase con dellos palos de bébora. Les entregues van realizase nel Llagar de Mestes.

El VI Concursu de Sidre Casero de Piloña tien como oxetivu cellebrar un díi d’alcuentru festivu ente los llagareros y dar puxu a la cultura sidrera nel conceyu, amás de destacar el llabor que desenvuelven nel caltenimientu d’esta tradición. La intención ye que toles collaciones del conceyu tean representaes, polo qu’animen a participar a toos aquellos qu’ellaboren bebida en casa. El presidente d’esti colleutivu, Luis Sariegu, destaca que “Piloña ye un de los conceyos productores de mazana más importantes d’Asturies, con una calidá del frutu escepcional por cuenta de la so orografía y al so tarrén, ente otres coses, y eso refléxase na cantidá de llagares caseros qu’hai”. 

L’Asociación de Sidre Casero de Piloña nació en 2016 con vocación de dar puxu a la sidre natural y la so manera d’ellaboración tradicional nos llagares non profesionales. El colleutivu escuerre fomentar y caltener la tradición d’ellaborar sidre pa en casa na fastera rural de Piloña, qu’en munches ocasiones ye una tradición heredada de los antepasaos. El conceyu piloñés tuvo un importante pasáu sidreru, pero que foi perdiéndose. Ello ye que namás queda un llagar industrial; polo que ye entá mayor l’enfotu de l’asociación en que la cultura de la sidre nun se pierda nos pueblos y una forma de consiguilo ye premiando y reconociendo’l llabor que rialicen estos llagareros non profesionales.


(Visited 2.466.608 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies