Inicio > AS > Noticies > Pal fríu, sidre caldio …
Noticies

Pal fríu, sidre caldio …

Una  prestosa receta que combate’l fríu, desentruya les ñarices, asela’l dolor de gargüelu y que ye bien bono de tresnar.

LA SIDRA.- Sigún indiquen los meteorólogos avérense dellos envernaes de fríu. A diferencia del añu pasáu, el termómetru yá marca “les temperatures a les que tamos avezos” – conforme se desplicala sabiduría popular–. Tamién yá fixeron la so apaición los primeros resfriaos. Nes nueses sidreríes yá vemos que los caldos de pita, de cocíu o de mariscu pidense d’avezu.

Pero ¿y la sidre caldio? Nos mercaos de delles ciudaes europees, amás del vinu caldio, tamién atopamos ‘sidre caldio. Una bébora, esta postrera, que nun ye mui popular equí n’Asturies, pesia que les recetes pa ellaborala tuvieron presentes nes cases d’esti país dende tiempos imemoriales.

 

Dende esta plataforma ufiertámosvos la siguiente fórmula que, amás de ser una estupenda forma pa combatir el fríu y tastiar el nuesu productu estrella; tamién ye una escelente manera pa llevar meyor malures respiratories yá que desentruya les ñarices, asela’l dolor de gargüelu y apúrremos vitamines.

1 botella de sidre

Anís o auguardiente de mazana (a discreción)

Media caña de canela

2 cuyaraes de miel.

3 clavos de golor.

1 granu de pimienta negro bien molío

Una tira de pulgu de naranxa o una rodaxa entera.

La forma de tresnalo nun puede ser más cenciella. Nuna pota pónense tolos ingredientes –menos la tira del pulgu de naranxa o la rodaxa– y faise ferver, daxandolo ferver a fueu baxo demientres unos diez minutos. Prébase y ye’l momentu de correxir el dulzor, si se quier más dulce,  amiéstase-y más miel. A la de sirvir, cuéyese’l pulgu de naranxa y pártese enriba la taza por que suelte l’arume y dea un toque d’amargor. Delles presones tamién gusten d’echar al amiestu mores –si inda les atopamos nos bardiales–, o una rodaxa de naranxa entera. ¡A esfrutar!

(Visited 2.465.627 times)
Compartir

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.

Esti sitiu ueb utiliza cookies pa que vusté tea la meyor esperiencia d'usuariu. Si continúa navegando ta dando¡l so consentimientu pa l'aceptación de les mencionaes cookies y l'aceptación de la nuesa política de cookies. ACEPTAR

Aviso de cookies